റിയാദ്: ഫുട്ബോൾ മൈതാനത്ത് വിസ്മയങ്ങൾ തീർക്കുന്ന ക്രിസ്റ്റ്യാനോ റൊണാൾഡോയുടെ കരിയറിൽ മറ്റൊരു അപൂർവ്വ നാഴികക്കല്ലിന് വഴിയൊരുങ്ങുന്നു. റൊണാൾഡോയുടെ മകൻ ക്രിസ്റ്റ്യാനോ ജൂനിയറിനെ അൽ നാസർ സീനിയർ ടീമിലേക്ക് സ്ഥാനക്കയറ്റം നൽകാൻ ക്ലബ്ബ് അധികൃതർ ആലോചിക്കുന്നതായാണ് റിപ്പോർട്ടുകൾ. അടുത്ത സീസണിൽ അച്ഛനും മകനും ഒരേ ജേഴ്സിയിൽ കളത്തിലിറങ്ങാനുള്ള സാധ്യതയാണ് ഇതോടെ തെളിഞ്ഞിരിക്കുന്നത്.

നിലവിൽ 15 വയസ്സുള്ള ജൂനിയർ അൽ നാസറിന്റെ യൂത്ത് ടീമിലെ മിന്നും താരമാണ്. സീനിയർ ടീമിനൊപ്പം മകനെയും ഉൾപ്പെടുത്തി ഒരു ചരിത്ര നീക്കത്തിനാണ് സഊദി പ്രോ ലീഗ് ഭീമന്മാർ തയ്യാറെടുക്കുന്നതെന്ന് ഗോൾ ഡോട്ട് കോം റിപ്പോർട്ട് ചെയ്യുന്നു.

അമ്പരപ്പിക്കുന്ന കണക്കുകൾ:

റൊണാൾഡോയുടെ ഗോൾ വേട്ടയുടെ പാരമ്പര്യം ജൂനിയറിനും ആവർത്തിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്.യുവന്റസ് അണ്ടർ-9 ടീമിനായി 23 മത്സരങ്ങളിൽ നിന്ന് 58 ഗോളുകൾ താരം നേടിയിരുന്നു.അൽ നാസർ അണ്ടർ-15 ടീമിനായി 27 മത്സരങ്ങളിൽ നിന്ന് 56 ഗോളുകളും നേടിയിട്ടുണ്ട്.

ഈ തകർപ്പൻ ഫോമാണ് 15-ാം വയസ്സിൽ തന്നെ താരത്തെ സീനിയർ ടീമിലെത്തിക്കാൻ ക്ലബ്ബിനെ പ്രേരിപ്പിക്കുന്നത്. റയൽ മാഡ്രിഡ്, യുവന്റസ്, മാഞ്ചസ്റ്റർ യുണൈറ്റഡ് അക്കാദമികളിലെ പരിചയസമ്പത്തും ജൂനിയറിന് മുതൽകൂട്ടാണ്.

റൊണാൾഡോയുടെ സ്വപ്നം:

തന്റെ കരിയർ അവസാനിക്കുന്നതിന് മുൻപ് മകനോടൊപ്പം പിച്ച് പങ്കിടുക എന്നത് 41-കാരനായ റൊണാൾഡോയുടെ വലിയ ആഗ്രഹങ്ങളിലൊന്നാണ്. ഈ സീസണിന്റെ അവസാനത്തിൽ ജൂനിയറിന്റെ ശാരീരികക്ഷമതയും തയ്യാറെടുപ്പും വിലയിരുത്തിയ ശേഷം ക്ലബ്ബ് അന്തിമ തീരുമാനമെടുക്കും. റൊണാൾഡോ തന്റെ കരിയറിലെ 1000-ാം ഗോൾ എന്ന ലക്ഷ്യത്തിലേക്ക് നീങ്ങുമ്പോൾ, ആ ഗോളുകളിൽ ഒന്നിന് മകൻ അസിസ്റ്റ് നൽകുക എന്ന വൈകാരികമായ നിമിഷത്തിനായാണ് ആരാധകർ കാത്തിരിക്കുന്നത്.

കഴിഞ്ഞ ദിവസം എഎഫ്‌സി ചാമ്പ്യൻസ് ലീഗ് ക്വാർട്ടർ ഫൈനലിൽ അൽ-വാസലിനെതിരെ റൊണാൾഡോ തന്റെ 969-ാമത്തെ ഗോൾ നേടി. മത്സരത്തിൽ അൽ നാസർ 4-0 ന് വിജയിച്ച് സെമിഫൈനലിൽ പ്രവേശിച്ചു.