അബുദബി: അടിയന്തര സാഹചര്യങ്ങളെയും അപകടസാധ്യതകളെയും നേരിടാൻ വിദ്യാഭ്യാസ സ്ഥാപനങ്ങളെ സജ്ജമാക്കുന്നതിനായി സമഗ്രമായ സുരക്ഷാ മാർഗ്ഗനിർദ്ദേശങ്ങൾ (School Safety Guide) പുറത്തിറക്കി അബുദബി അധികൃതർ. വിദ്യാഭ്യാസ വിജ്ഞാന വകുപ്പിന്റെയും (ADEK) അബുദബി മീഡിയ ഓഫീസിന്റെയും സഹകരണത്തോടെ അബുദാബി എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് സെന്ററാണ് ഗൈഡ് തയ്യാറാക്കിയിരിക്കുന്നത്. 2026-ലും ഈ മാർഗ്ഗനിർദ്ദേശങ്ങൾ പ്രാബല്യത്തിലുണ്ടാകും.

എല്ലാവർക്കും ഉത്തരവാദിത്തം; 'നമ്മുടെ സമൂഹം തയ്യാറാണ്'

"നമ്മുടെ സമൂഹം തയ്യാറാണ്" എന്ന കാമ്പെയ്‌നിന്റെ ഭാഗമായാണ് ഗൈഡ് പുറത്തിറക്കിയിരിക്കുന്നത്. വിദ്യാർത്ഥി വീട്ടിൽ നിന്ന് ഇറങ്ങുന്നത് മുതൽ തിരികെ എത്തുന്നത് വരെയുള്ള ഓരോ ഘട്ടത്തിലും സുരക്ഷ ഉറപ്പാക്കാനായി എല്ലാവർക്കും പ്രത്യേക ഉത്തരവാദിത്തങ്ങൾ നൽകിയിട്ടുണ്ട്:

1. മാതാപിതാക്കൾ

• ഔദ്യോഗിക അറിയിപ്പുകൾ ലഭിക്കുന്നത് വരെ കുട്ടികളെ സ്കൂളിലേക്ക് അയക്കരുത്.
• കിംവദന്തികൾ വിശ്വസിക്കാതെ ഔദ്യോഗിക ആശയവിനിമയ മാർഗങ്ങളെ മാത്രം ആശ്രയിക്കുക.
• സ്കൂളുമായി ബന്ധപ്പെടാനുള്ള ഫോൺ നമ്പറുകൾ കരുതുക.

2. അധ്യാപകർ

• അടിയന്തര സാഹചര്യങ്ങളിൽ പാഠഭാഗങ്ങൾ നിർത്തിവെച്ച് കുട്ടികളെ ധൈര്യപ്പെടുത്തണം.
• എക്സിറ്റ് വഴികളും അസംബ്ലി പോയിന്റുകളും കൃത്യമായി അറിഞ്ഞിരിക്കണം.
• നിശ്ചയദാർഢ്യമുള്ള കുട്ടികൾക്ക് പ്രത്യേക ശ്രദ്ധ നൽകണം.

3. സ്കൂൾ ബസുകൾ

• ഡ്രൈവർമാരും സൂപ്പർവൈസർമാരും വിദ്യാർത്ഥികളുടെ സീറ്റ് ബെൽറ്റും ഇരിപ്പിടവും ഉറപ്പാക്കണം.
• അപകടമുണ്ടായാൽ സുരക്ഷിതമായ സ്ഥലത്ത് ബസ് നിർത്തി ഉടൻ അധികൃതരെ വിവരം അറിയിക്കണം.
• സുരക്ഷാ ഉദ്യോഗസ്ഥരും വിദ്യാർത്ഥികളും

സ്കൂൾ പരിസരത്തെ സുരക്ഷിത മേഖലകൾ നിശ്ചയിക്കാനും അലാറം സംവിധാനങ്ങൾ പ്രവർത്തനസജ്ജമാണെന്ന് ഉറപ്പാക്കാനും സുരക്ഷാ ഉദ്യോഗസ്ഥർക്ക് നിർദ്ദേശമുണ്ട്. വിദ്യാർത്ഥികൾ അധ്യാപകരുടെ നിർദ്ദേശങ്ങൾ കർശനമായി പാലിക്കണമെന്നും അടിയന്തര സാഹചര്യങ്ങളിൽ ഫോട്ടോ എടുക്കുന്നതോ വിവരങ്ങൾ പങ്കുവെക്കുന്നതോ ഒഴിവാക്കണമെന്നും ഗൈഡിൽ വ്യക്തമാക്കുന്നു.

സുരക്ഷ എന്നത് വ്യക്തിഗതമായ ഒന്നല്ല, മറിച്ച് എല്ലാവരുടെയും കൂട്ടായ ഉത്തരവാദിത്തമാണെന്ന സന്ദേശമാണ് പുതിയ ഗൈഡ് നൽകുന്നത്. ഇത്തരം സാഹചര്യങ്ങളിൽ സ്വയം തീരുമാനങ്ങൾ എടുക്കാതെ ഔദ്യോഗിക നിർദ്ദേശങ്ങൾ മാത്രം പിന്തുടരുന്നത് അപകടസാധ്യതകൾ കുറയ്ക്കാൻ സഹായിക്കും.

abu dhabi authorities have released new school safety guidelines aimed at ensuring student security and preventing panic. the measures focus on emergency preparedness, awareness, and coordinated response systems to create a safer environment for students, staff, and parents across schools.