വാഷിങ്ടൺ: ഇറാനെതിരായ സൈനിക നീക്കങ്ങൾ തങ്ങളുടെ സഖ്യകക്ഷിയായ ഇസ്റാഈലിന്റെ അഭ്യർത്ഥന പ്രകാരമാണെന്ന് ഔദ്യോഗികമായി സമ്മതിച്ച് അമേരിക്ക. ഐക്യരാഷ്ട്രസഭയുടെ സുരക്ഷാ കൗൺസിലിന് നൽകിയ കത്തിലാണ് യുഎസ് ഇക്കാര്യം വ്യക്തമാക്കിയത്. 'കൂട്ടായ സ്വയംരക്ഷ' (Collective Self-Defense) എന്ന തത്വത്തിന്റെ അടിസ്ഥാനത്തിലാണ് യുദ്ധത്തിൽ പങ്കുചേരുന്നതെന്നാണ് വാഷിങ്ടണിന്റെ വിശദീകരണം.

ലക്ഷ്യം ഇറാന്റെ നാവികസേനയും ആണവ കേന്ദ്രങ്ങളും

2026 ഫെബ്രുവരി 28-നാണ് അമേരിക്കൻ സായുധ സേന ഇറാനെതിരെ 'ഓപ്പറേഷൻ എപിക് ഫ്യൂറി' ആരംഭിച്ചത്. യുദ്ധം രണ്ട് മാസം പിന്നിടുമ്പോൾ ആക്രമണത്തിന്റെ ലക്ഷ്യങ്ങൾ അമേരിക്ക അക്കമിട്ടു നിരത്തുന്നു.ഇറാൻ ഒരിക്കലും ആണവായുധങ്ങൾ കൈവശം വെക്കില്ലെന്ന് ഉറപ്പാക്കുക,ഇറാന്റെ ആക്രമണാത്മക മിസൈലുകളും അവയുടെ ഉത്പാദന കേന്ദ്രങ്ങളും തകർക്കുക,ഇറാന്റെ നാവികസേനയെയും സുരക്ഷാ സംവിധാനങ്ങളെയും പൂർണ്ണമായും നിർവീര്യമാക്കുക എന്നിവയാണ് അമേരിക്കൻ ലക്ഷ്യങ്ങൾ.

അന്താരാഷ്ട്ര നിയമങ്ങളെ തള്ളി യുഎസ്

തങ്ങളുടെ നടപടികൾ അന്താരാഷ്ട്ര നിയമങ്ങൾക്ക് വിരുദ്ധമാണെന്ന ലോകരാജ്യങ്ങളുടെ വിമർശനം അമേരിക്ക തള്ളിക്കളഞ്ഞു. മേഖലയിൽ പതിറ്റാണ്ടുകളായി ഇറാൻ നടത്തിവരുന്ന ശത്രുതാപരമായ നീക്കങ്ങളും പ്രകോപനങ്ങളുമാണ് ഇപ്പോഴത്തെ സംഘർഷത്തിന് കാരണമെന്ന് യുഎസ് സ്റ്റേറ്റ് ഡിപ്പാർട്ട്മെന്റ് വക്താക്കൾ അറിയിച്ചു. ഇസ്റാഈലിന്റെ സുരക്ഷയ്ക്ക് പുറമെ അമേരിക്കയുടെ സ്വയംരക്ഷയ്ക്കുള്ള അവകാശം കൂടിയാണ് ഈ യുദ്ധമെന്നാണ് യുഎസ് നിലപാട്.

ഇറാന്റെ ആണവ-മിസൈൽ പദ്ധതികൾ തടഞ്ഞാൽ മാത്രമേ പശ്ചിമേഷ്യയിൽ സമാധാനം പുനഃസ്ഥാപിക്കാൻ കഴിയൂ എന്ന ഇസ്റാഈലിന്റെ വാദത്തെ അമേരിക്ക പൂർണ്ണമായും പിന്തുണയ്ക്കുകയാണ്. ഹോർമുസ് കടലിടുക്ക് അടക്കമുള്ള തന്ത്രപ്രധാന മേഖലകളിൽ സംഘർഷം തുടരുന്നത് ആഗോള സാമ്പത്തിക രംഗത്തെയും ഗുരുതരമായി ബാധിച്ചിട്ടുണ്ട്.