ദുബൈ: പ്രാദേശികമായ അനിശ്ചിതത്വങ്ങൾക്കും വെല്ലുവിളികൾക്കും ഇടയിലും പതറാതെ മുന്നോട്ട് നീങ്ങുകയാണ് യുഎഇ. അതിർത്തികളിൽ സംഘർഷഭരിതമായ സാഹചര്യങ്ങൾ നിലനിന്നിട്ടും, രാജ്യത്തിന്റെ വികസന അജണ്ടകളിൽ നിന്ന് ഒരിഞ്ച് പിന്നോട്ടില്ലെന്ന് യുഎഇ ഭരണാധികാരികൾ പ്രവൃത്തിയിലൂടെ തെളിയിക്കുകയാണ്. ബില്യൺ കണക്കിന് ദിർഹത്തിന്റെ വമ്പൻ പദ്ധതികളും ജനക്ഷേമ പാക്കേജുകളും പ്രഖ്യാപിച്ചുകൊണ്ട് ജനങ്ങൾക്ക് ആത്മവിശ്വാസം പകരുകയാണ് നേതൃത്വം.

"നമ്മുടെ സ്ഥാപക നേതാക്കൾ വെട്ടിത്തുറന്ന പാതയിൽ തന്നെയാകും യാത്ര. ദൈവം അനുവദിച്ചാൽ, നമ്മൾ ഇനി മെച്ചപ്പെട്ടതിലേക്ക് മാത്രമേ മാറുകയുള്ളൂ." യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ വാക്കുകൾ രാജ്യത്തിന്റെ നിലപാട് വ്യക്തമാക്കികൊണ്ട പറഞ്ഞു. സംഘർഷങ്ങൾക്കും മിസൈൽ ഭീഷണികൾക്കും മറുപടിയായി ഭീതിയല്ല, മറിച്ച് കൂടുതൽ കരുത്തുറ്റ നിർമ്മാണ പ്രവർത്തനങ്ങളാണ് യുഎഇയിൽ നടക്കുന്നത്.

വികസന പ്രവർത്തനങ്ങളിൽ ഒരു മന്ദഗതിയും ഉണ്ടാകില്ലെന്ന് ദുബൈ ഭരണാധികാരി ശൈഖ് മുഹമ്മദ് ബിൻ റാഷിദ് അൽ മക്തൂമും ഉറപ്പിച്ചു പറഞ്ഞു. ദുബൈ മെട്രോയുടെ 34 ബില്യൺ ദിർഹത്തിന്റെ 'ഗോൾഡൻ ലൈൻ' പദ്ധതിയും 3 ബില്യൺ ദിർഹത്തിന്റെ ബീച്ച് വികസന പദ്ധതിയും ഇതിന്റെ ഉദാഹരണങ്ങളാണ്. "ഞങ്ങൾ ചെയ്യുന്നത് പറയുകയും പറയുന്നത് പ്രവർത്തിക്കുകയും ചെയ്യുന്നവരാണ്," എന്ന അദ്ദേഹത്തിന്റെ വാക്കുകൾ രാജ്യത്തിന്റെ പുരോഗതിയിൽ ജനങ്ങൾക്കുള്ള വിശ്വാസം വർധിപ്പിക്കുന്നു.

അടിസ്ഥാന സൗകര്യങ്ങൾക്കൊപ്പം തന്നെ ഓരോ പൗരന്റെയും സുരക്ഷയ്ക്കും ക്ഷേമത്തിനും ഭരണകൂടം വലിയ പ്രാധാന്യമാണ് നൽകുന്നത്. ദുബൈ കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ച 1 ബില്യൺ ദിർഹത്തിന്റെ ദുരിതാശ്വാസ പാക്കേജ് ബിസിനസ് മേഖലയ്ക്കും സാധാരണ കുടുംബങ്ങൾക്കും വലിയ ആശ്വാസമായി. "ദുബൈ ശക്തമാണ്, യുഎഇയും ശക്തമാണ്," എന്ന സന്ദേശമാണ് അദ്ദേഹം ലോകത്തിന് നൽകിയത്.

ALSO READ: ഗൾഫ് മേഖലയിൽ 'ആഭ്യന്തര യുദ്ധ' ഭീഷണി; സ്ലീപ്പർ സെല്ലുകൾക്കെതിരെ ജാഗ്രത വേണമെന്ന് ദുബൈ ഫോറത്തിൽ മുന്നറിയിപ്പ്

വിദേശകാര്യ മന്ത്രി ശൈഖ് അബ്ദുല്ല ബിൻ സായിദ്, ഷെയ്ഖ് മൻസൂർ ബിൻ സായിദ് തുടങ്ങിയ നേതാക്കളും തങ്ങളുടെ വകുപ്പുകളിലൂടെ രാജ്യത്തിന്റെ സുസ്ഥിരത ഉറപ്പാക്കുന്നുണ്ട്. 'നഫീസ്' പോലുള്ള പദ്ധതികളിലൂടെ സ്വദേശി ശാക്തീകരണം ഉറപ്പാക്കുമ്പോൾ തന്നെ, പ്രവാസികൾ ഉൾപ്പെടെയുള്ള എല്ലാവർക്കും സുരക്ഷിതമായ ഒരു സങ്കേതമായി യുഎഇ നിലകൊള്ളുന്നു.

റാസൽഖൈമ ഭരണാധികാരി ശൈഖ് സൗദ് ബിൻ സഖർ അൽ ഖാസിമി ചൂണ്ടിക്കാട്ടിയതുപോലെ, സഹവർത്തിത്വത്തിന്റെയും കാരുണ്യത്തിന്റെയും അതുല്യ മാതൃകയാണ് യുഎഇ. രാജ്യത്തെ സംരക്ഷിക്കുന്ന സായുധ സേനയുടെ അച്ചടക്കവും ജാഗ്രതയും ഈ സമാധാന അന്തരീക്ഷത്തിന് കരുത്ത് പകരുന്നു.

എത്ര വലിയ വെല്ലുവിളികൾ ഉണ്ടായാലും യുഎഇയുടെ പുരോഗതിയുടെ വേഗത ഇരട്ടിയാകുമെന്ന ഭരണാധികാരികളുടെ ഉറപ്പാണ് താമസക്കാർക്കും ആഗോള നിക്ഷേപകർക്കും ഒരുപോലെ ആത്മവിശ്വാസം നൽകുന്നത്.

uae development growth projects continue to drive progress as the nation advances ambitious plans and infrastructure initiatives despite global and regional challenges