മക്ക: ഈ വര്‍ഷത്തെ പരിശുദ്ധ ഹജ്ജ് സേവനത്തിനായി വളണ്ടിയര്‍ സേവനം അനുഷ്ഠിച്ച വിഖായ വളണ്ടിയര്‍മാരെ ആദരിച്ചു. മക്കയിലെ വിഖായ ക്യാമ്പില്‍ നടന്ന പരിപാടിയില്‍ എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ സര്‍ട്ടിഫിക്കറ്റുകള്‍ വിതരണം ചെയ്തു.

പരിശുദ്ധ ഹജ്ജ് നിര്‍വഹിക്കാനെത്തുന്ന അല്ലാഹുവിന്റെ അതിഥികളെ സേവിക്കാന്‍ കിട്ടുന്ന അപൂര്‍വ അവസരം ഏതൊരു വിശ്വാസിക്കും അതീവ ഹൃദ്യവും അവിസ്മരണീയവുമായ അനുഭവവുമായിരിക്കുമെന്നും, ഒരു പുരുഷായുസ്സില്‍ ആത്മനിര്‍വൃതിയടയാനും സേവനപാതയില്‍ ആത്മസായൂജ്യം ലഭിക്കുവാനും കിട്ടുന്ന അസുലഭ നിമിഷങ്ങള്‍ തീര്‍ഥാടന സേവനത്തിന്റെ നേര്‍കാഴ്ചകളായിരിക്കും നമുക്ക് പ്രധാനം ചെയ്യുന്നതെന്നും സര്‍ട്ടിഫിക്കറ്റുകള്‍ വിതരണം ചെയ്തു കൊണ്ട് അദ്ദേഹം പറഞ്ഞു.

സമസ്ത കേരള ഇസ്‌ലാമിക് സെന്റര്‍ സഊദി നാഷണല്‍ കമ്മിറ്റി ചെയര്‍മാന്‍ ഓമാനൂര്‍ അബ്ദുറഹിമാന്‍ മൗലവി ചടങ്ങില്‍ അധ്യക്ഷത വഹിച്ചു. എസ്.കെ.എസ്.എസ്.എഫ് സംസ്ഥാന ട്രഷറര്‍ ബഷീര്‍ ഫൈസി ദേശമംഗലം ചടങ്ങില്‍ മുഖ്യപ്രഭാഷണം നടത്തി.

സയ്യിദ് ഹൈദരലി ശിഹാബ് തങ്ങള്‍, എസ്.കെ.എസ്.എസ്.എഫ് സംസ്ഥാന പ്രസിഡണ്ട് ഹമീദലി ശിഹാബ് തങ്ങള്‍, വിഖായ ജനറല്‍ കണ്‍വീനര്‍ സുബൈര്‍ ഹുദവി എന്നിവര്‍ ഒപ്പിട്ട സര്‍ട്ടിഫിക്കറ്റുകളാണ് വിവിധ പ്രവശ്യകളില്‍ നിന്നെത്തിയ വളണ്ടിയര്‍ ക്യാപ്റ്റന്മാര്‍ ഏറ്റുവാങ്ങിയത്.

സൗദിയിലെ ജിദ്ദ, റിയാദ്, മക്ക, ദമ്മാം, മദീന, താഇഫ്, ബുറൈദ, ഖസീം, യാമ്പു, ജിസാന്‍, റാബിഗ്, ജുബൈല്‍ തുടങ്ങി വിവിധ ദിക്കുകളില്‍ നിന്നെത്തിയ അഞ്ഞൂറില്‍ പരം വോളണ്ടിയര്‍മാരാണ് എസ്.കെ.എസ്.എസ്.എഫ് നേതൃത്വം നല്‍കുന്ന സമസ്ത കേരള ഇസ്‌ലാമിക് സെന്റിനു കീഴിലായി ഈ കൊല്ലം കര്‍മ്മ രംഗത്തിറങ്ങിയിരുന്നത്.

വിഖായ ഹജ്ജ് സെല്‍ നേതാക്കളായ അബൂബക്കര്‍ ഫൈസി ചെങ്ങമ്മനാട്, അബ്ദുല്ല കുപ്പം, സയ്യിദ് സഹല്‍ തങ്ങള്‍, മുസ്തഫ ബാഖവി ഊരകം, കരീം ഫൈസി കീഴാറ്റൂര്‍, സക്കറിയ ഫൈസി പന്തല്ലൂര്‍, ഷാഫി ദാരിമി, അബൂബക്കര്‍ ദാരിമി ആലമ്പാടി, അബൂബക്കര്‍ ഫൈസി താമരശ്ശേരി, വളണ്ടിയര്‍ കോര്‍ഡിനേറ്റര്‍മാരായ മൊയ്തീന്‍കുട്ടി അരിമ്പ്ര, സവാദ് പേരാമ്പ്ര, ദില്‍ഷാദ് തലാപ്പില്‍, റഷീദ് മണിമൂളി എന്നിവര്‍ സംസാരിച്ചു.

വിഖായ സഊദി നാഷണല്‍ കമ്മിറ്റി ചെയര്‍മാന്‍ സി.എം അലി മൗലവി നാട്ടുകല്‍ സ്വാഗതവും വിഖായ നാഷണല്‍ കമ്മിറ്റി കണ്‍വീനര്‍ സുബൈര്‍ ഹുദവി പട്ടാമ്പി നന്ദിയും പറഞ്ഞു.