തിരുനെല്ലി: വനാതിര്‍ത്തിയില്‍ കര്‍ഷകര്‍ക്കും പ്രദേശവാസികള്‍ക്കുമായി വനം വകുപ്പ് ലക്ഷങ്ങള്‍ മുടക്കി സ്ഥാപിച്ച ഷോക്ക് ഫെന്‍സിങും കാട്ടാന ട്രഞ്ച് നിര്‍മാണവും കര്‍ഷകര്‍ക്ക് ഉപകാരപ്രദമില്ലാത്ത നിലയിലാണണെന്ന് ആരോപണം. കഴിഞ്ഞ അഞ്ചു വര്‍ഷത്തില്‍ ആറു കോടി 28 ലക്ഷം രൂപ പ്രതിരോധ മാര്‍ഗങ്ങള്‍ക്കായി വൈല്‍ഡ് ലൈഫ് ചെലവഴിച്ചു എന്നാണ് കണക്കുകള്‍ സൂചിപ്പിക്കുന്നത്. ലക്ഷങ്ങള്‍ മുടക്കി സ്ഥാപിച്ച ഷോക്ക് ഫെന്‍സിങ് മുഴുവനും കാട്ടാന ചവിട്ടി പൊട്ടിച്ച് മണ്ണില്‍ തുരുമ്പെടുക്കുന്ന അവസ്ഥയിലാണ്.
കഴിഞ്ഞ ഒരു മാസത്തിനുള്ളില്‍ ലക്ഷക്കണക്കിന് രൂപയുടെ കാര്‍ഷിക വിളകളാണ് കാട്ടാനകള്‍ നശിപ്പിച്ചിട്ടുള്ളത്. കഴിഞ്ഞ രണ്ട് ദിവസത്തിനുള്ളില്‍ തോല്‍പെട്ടി പ്രദേശങ്ങളില്‍ മാത്രം കാട്ട് കൊമ്പന്‍ മോഴയാനയുടെ പരാക്രമണത്തില്‍ മൂന്നേക്കറോളം നെല്‍കൃഷിയും കാപ്പി, കമുക്, തെങ്ങ് തുടങ്ങിയവയും നശിപ്പിച്ചിട്ടുണ്ട്. മുമ്പൊന്നുമില്ലാത്ത രീതിയിലാണ് കാട്ടാന ശല്യം ഇപ്പോള്‍ രൂക്ഷമായിരിക്കുന്നത്. സന്ധ്യമയങ്ങുമ്പോള്‍ തന്നെ നാട്ടിലേക്കിറങ്ങുന്ന കാട്ടാനകളെ ഭയന്ന് പുറത്തിറങ്ങുവാന്‍ പോലും സാധിക്കാതെ അവസ്ഥിയാണുള്ളത്. കര്‍ണാടക നാഗര്‍ഹോള അതിര്‍ത്തിയില്‍ സ്ഥാപിച്ച റെയില്‍ തിരുനെല്ലി വനാതിര്‍ത്തികളിലും സ്ഥാപിക്കണമെന്ന ആവശ്യവും ഉയരുന്നുണ്ട്.