കൊച്ചി: രാജ്യത്ത് വാണിജ്യ എല്‍പിജി വില വര്‍ധിപ്പിച്ചതിന് പിന്നാലെ ഉല്‍പ്പന്നങ്ങള്‍ക്ക് വില വര്‍ധിപ്പിക്കാനൊരുങ്ങി ഹോട്ടല്‍ ഉടമകള്‍. പ്രതിസന്ധി മറികടക്കാന്‍ ഭക്ഷണ സാധനങ്ങള്‍ക്ക് വില വര്‍ധിപ്പിക്കേണ്ടത് അത്യാവശ്യമാണെന്ന് ഉടമകള്‍ പറയുന്നു. എല്‍പിജി പ്രതിസന്ധി ദൂരവ്യാപക പ്രത്യാഘാതങ്ങള്‍ക്ക് കാരണമാകുമെന്നാണ് വിദഗ്ദരുടെ നിരീക്ഷണം.

വാണിജ്യ സിലിണ്ടറിനുള്ള 18 ശതമാനം ജിഎസ്ടിയിലൂടെ 500 രൂപയാണ് നികുതി നല്‍കേണ്ടി വരുന്നത്. വോട്ടെടുപ്പ് കഴിഞ്ഞതിന് തൊട്ടുപിന്നാലെ ആയിരം രൂപയ്ക്കടുത്താണ് കേന്ദ്ര സര്‍ക്കാര്‍ വില വര്‍ധിപ്പിച്ചത്. നടപടിയില്‍ പ്രതിഷേധിച്ച് മെയ് 6ന് സംസ്ഥാന വ്യാപകമായി കടകളടച്ച് പ്രതിഷേധിക്കുമെന്ന് കേരള ഹോട്ടല്‍ ആന്‍ഡ് റസ്‌റ്റോറന്റ് അസോസിയേഷന്‍ പ്രഖ്യാപിച്ചിരുന്നു. 

ALSO READ: കൊടുവള്ളിയില്‍ അമിത വേഗത്തിലെത്തിയ കാര്‍ ലോറിയില്‍ ഇടിച്ച് അപകടം; ഏഴുപേര്‍ക്ക് പരിക്ക് 

അഞ്ച് സംസ്ഥാനങ്ങളിലെ തെരഞ്ഞെടുപ്പ് പൂര്‍ത്തിയായതിന് ശേഷമാണ് ജീവനക്കാരുടെ നെഞ്ചത്തടിച്ച് മോദി സര്‍ക്കാര്‍ വില വര്‍ധനവ് നടപ്പാക്കിയത്. ഇതിനെതിരെ രാജ്യത്തുടനീളം ശക്തമായ പ്രതിഷേധമാണ് ഉയരുന്നത്. ഡല്‍ഹിയില്‍ നിലവില്‍ ഗ്യാസ് വില 3071.50 രൂപയായി ഉയര്‍ന്നു. മുംബൈ 3024, കൊച്ചി 3085, തിരുവനന്തപുരം 3106, കോഴിക്കോട് 3117.5 എന്നിങ്ങനെയാണ് വില വര്‍ധിച്ചത്. 

കേരളം, അസം, പശ്ചിമ ബംഗാള്‍, തമിഴ്‌നാട് സംസ്ഥാനങ്ങളിലായി നിയമസഭാ തെരഞ്ഞെടുപ്പ് പൂര്‍ത്തിയാകുന്നതോടെ ഗ്യാസ് വിലയിലും, പെട്രോള്‍ വിലയിലും വര്‍ധനവുണ്ടാകുമെന്ന് നേരത്തെ അഭ്യൂഹമുണ്ടായിരുന്നു. പല രാഷ്ട്രീയ നിരീക്ഷകരും കേന്ദ്ര സര്‍ക്കാരിന്റെ നടപടിക്കെതിരെ മുന്നറിയിപ്പും നല്‍കിയിരുന്നു. പശ്ചിമ ബംഗാളില്‍ ഏപ്രില്‍ 29ന് അവസാന ഘട്ട വോട്ടെടുപ്പ് അവസാനിച്ചു. കൃത്യം ഒരു ദിവസം പിന്നിട്ട് മെയ് 1നാണ് ആയിരം രൂപയ്ക്കടുത്ത് വില വര്‍ധിപ്പിച്ചത്.

Hotel owners may increase food prices after a hike in commercial LPG rates.