ദുബൈ: യുഎഇയിൽ വേനൽ കടുക്കുന്നു. വരും ദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ ചൂട് ഗണ്യമായി വർധിക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) മുന്നറിയിപ്പ് നൽകി. ഉൾനാടൻ പ്രദേശങ്ങളിൽ താപനില 40 ഡിഗ്രി സെൽഷ്യസിന് മുകളിലേക്ക് ഉയരാൻ സാധ്യതയുണ്ട്. നിലവിൽ തെളിഞ്ഞ ആകാശമാണെങ്കിലും വായുസമ്മർദ്ദത്തിലുണ്ടാകുന്ന മാറ്റങ്ങൾ വരും ദിവസങ്ങളിൽ കാലാവസ്ഥയെ സ്വാധീനിക്കും.

ഞായറാഴ്ച രാജ്യത്തിന്റെ മിക്ക ഭാഗങ്ങളിലും തെളിഞ്ഞ കാലാവസ്ഥയായിരുന്നു. തീരപ്രദേശങ്ങളിൽ താപനില 30 ഡിഗ്രി സെൽഷ്യസ് രേഖപ്പെടുത്തിയപ്പോൾ ഉൾനാടുകളിൽ ചൂട് കൂടുതലായിരുന്നു. വടക്ക്-പടിഞ്ഞാറൻ കാറ്റിന്റെ സ്വാധീനം മൂലം തിങ്കളാഴ്ച താപനിലയിൽ നേരിയ കുറവുണ്ടായേക്കാമെങ്കിലും ബുധനാഴ്ചയോടെ വീണ്ടും ചൂട് കൂടാനാണ് സാധ്യത. മണിക്കൂറിൽ 35 മുതൽ 40 കിലോമീറ്റർ വേഗതയിൽ വരെ കാറ്റ് വീശാൻ സാധ്യതയുള്ളതിനാൽ പൊടിപടലങ്ങൾ ഉയർന്നേക്കാം.

ALSO READ: മെഡിക്കൽ സ്വപ്നങ്ങളുമായി പ്രവാസലോകത്തെ വിദ്യാർഥികൾ; യുഎഇയിൽ നീറ്റ് പരീക്ഷ എഴുതുന്നത് 1800-ഓളം പേർ

തീരങ്ങളിൽ മൂടൽമഞ്ഞ് ജാഗ്രത

ചൊവ്വാഴ്ച രാത്രിയോടെയും ബുധനാഴ്ച പുലർച്ചെയോടെയും തീരപ്രദേശങ്ങളിൽ ഈർപ്പത്തിന്റെ അളവ് വർധിക്കാൻ സാധ്യതയുണ്ട്. ഇത് ചിലയിടങ്ങളിൽ കാഴ്ചപരിധി കുറയ്ക്കുന്ന രീതിയിലുള്ള മൂടൽമഞ്ഞിന് കാരണമായേക്കാം. വാഹനമോടിക്കുന്നവർ പുലർച്ചെ സമയങ്ങളിൽ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.

അറേബ്യൻ ഗൾഫിലും ഒമാൻ കടലിലും നിലവിൽ ശാന്തമായ സാഹചര്യമാണെങ്കിലും വ്യാഴാഴ്ചയോടെ കടൽ പ്രക്ഷുബ്ധമാകാൻ സാധ്യതയുണ്ട്. വ്യാഴാഴ്ച രാത്രിയിലും വെള്ളിയാഴ്ച പുലർച്ചെയും കടലിൽ പോകുന്നവർ കാലാവസ്ഥാ അപ്ഡേറ്റുകൾ ശ്രദ്ധിക്കണം.

uae summer heat is intensifying with temperatures expected to reach 45 degrees in inland areas. authorities have issued safety advisories urging residents to stay hydrated, avoid peak sun hours, and take heat precautions.