ചെന്നൈ: തമിഴകത്ത് നിന്ന് വീണ്ടും 'സര്‍പ്രൈസ്'. വിജയ്‌യുടെ തമിഴക വെട്രി കഴകത്തിന് (ടിവികെ) പിന്തുണ നല്‍കാനുള്ള തിരക്കിട്ട നീക്കങ്ങള്‍ എഐഎഡിഎംകെ നടത്തുന്നതായാണ് ഇപ്പോള്‍ പുറത്തു വരുന്ന വാര്‍ത്ത. ടി.വി.കെയെ പിന്തുണക്കുന്നതുമായി ബന്ധപ്പെട്ട് എ.ഐ.എ.ഡി.എം.കെയില്‍ ഗുരുതരമായ ഭിന്നതയുണ്ടെന്ന റിപ്പോര്‍ട്ടുകള്‍ പുറത്തുവന്നതിന് മണിക്കൂറുകള്‍ക്കകമാണ് പുതിയ വാര്‍ത്ത. പിന്തുണ തേടി വിജയ് പാര്‍ട്ടി  മേധാവി എടപ്പാടി കെ പളനിസ്വാമിയുടെ വസതിയിലേക്ക് ബുധനാഴ്ച ഒരു കത്ത് അയച്ചതായാണ് റിപ്പോര്‍ട്ട്. സംസ്ഥാനത്ത് സഖ്യ സര്‍ക്കാര്‍ രൂപീകരിക്കുന്നതിന് വിജയ്ക്ക് പിന്തുണ നല്‍കുന്ന കാര്യം എ.ഐ.എ.ഡി.എം.കെ പരിഗണിക്കുന്നതായാണ് വിവരം.

തമിഴ്‌നാട്ടില്‍ നടന്ന തെരഞ്ഞെടുപ്പില്‍ 108 സീറ്റുകളുമായി ഏറ്റവും വലിയ ഒറ്റക്കക്ഷിയായ ടിവികെയെ പിന്തുണയ്ക്കുന്നതിനായി രാജ്യസഭാ എംപി സിവി ഷണ്‍മുഖത്തിന്റെ നേതൃത്വത്തിലുള്ള എ.ഐ.എ.ഡി.എം.കെ വിഭാഗം ചില എം.എല്‍.എമാരുടെ പിന്തുണ തേടിയതായി നേരത്തെ  റിപ്പോര്‍ട്ടുണ്ടായിരുന്നു. ടി.വികെയുമായി സഖ്യം ചേരാന്‍ പാര്‍ട്ടിക്കുള്ളില്‍ നിന്ന് പളനിസ്വാമിക്ക് സമ്മര്‍ദ്ദമുണ്ടെന്നാണ് സൂചന. വിജയുടെ അടുത്ത അനുയായി ആദവ് അര്‍ജുന ഇ.പി.എസിനെ കണ്ടതായും ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. 

ALSO READ: വിജയ്ക്ക് 'കൈ' കൊടുക്കും; തമിഴ്‌നാട്ടില്‍ ടി.വി.കെയുമായി സഖ്യത്തിന് തയ്യാറെന്ന് കോണ്‍ഗ്രസ്; എന്‍.ഡി.എ-എ.ഐ.എ.ഡി.എം.കെ സഖ്യത്തിലുണ്ടാവരുതെന്ന് വ്യവസ്ഥ, വഞ്ചിച്ചെന്ന വിമര്‍ശനവുമായി ഡി.എം.കെ

അതിനിടെ, ടി.വി.കെയെ പിന്തുണക്കാന്‍ കോണ്‍ഗ്രസ് തീരുമാനിച്ചതായി റിപ്പോര്‍ട്ടുണ്ടായിരുന്നു. അതേസമയം,  എന്‍.ഡി.എയുമായോ അഖിലേന്ത്യാ അണ്ണാ ദ്രാവിഡ മുന്നേറ്റ കഴകം (എഐഎഡിഎംകെ) ഉള്‍പ്പെടെയുള്ള സഖ്യകക്ഷികളുമായോ സഖ്യമുണ്ടാക്കരുതെന്ന വ്യവസ്ഥ കോണ്‍ഗ്രസ് മുന്നോട്ട് വെച്ചിട്ടുണ്ട്.

പിന്തുണ നല്‍കുന്ന കത്ത് കോണ്‍ഗ്രസ് ഇന്ന് ഗവര്‍ണര്‍ക്ക് കൈമാറുമെന്നാണ് സൂചന. ഇടതു പാര്‍ട്ടികളുടെ പിന്തുണ ഉറപ്പിക്കാന്‍ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ ഇടതു നേതാക്കളോട് സംസാരിച്ചതായും റിപ്പോര്‍ട്ടുകള്‍ വ്യക്തമാക്കുന്നു. അതിനിടെ, മന്ത്രിസഭാ രൂപീകരണം ആവശ്യപ്പെട്ട് ടി.വി.കെ നല്‍കിയ കത്തില്‍ ഗവര്‍ണര്‍ ഇന്ന് തീരുമാനമെടുത്തേക്കും.

സംസ്ഥാനത്തെ 234 സീറ്റുകളില്‍ 108 സീറ്റുകളിലാണ് ടി.വി.കെ വിജയിച്ചത്. കേവല ഭൂരിപക്ഷത്തിന് വെറും പത്ത് സീറ്റുകള്‍ മാത്രം അകലെ നില്‍ക്കുന്ന ജയമായിരുന്നു ടി.വി.കെയുടേത്. കേവല ഭൂരിപക്ഷമായ 118 എന്ന സംഖ്യയിലേക്കെത്തിക്കാതെ സത്യപ്രതിജ്ഞക്ക് വിളിക്കില്ലെന്ന് ഗവര്‍ണറും വ്യക്തമാക്കിയിരുന്നു. മെയ് 7ന് വിജയ് മുഖ്യമന്ത്രിയായി സത്യപ്രതിജ്ഞ ചെയ്യുമെന്നാണ് സൂചന. ഒപ്പം ഒമ്പത് മന്ത്രിമാരും സത്യപ്രതിജ്ഞ ചെയ്യും. 

amidst internal splits, aiadmk reportedly considers backing vijay-led tvk in tamil nadu. with congress already extending support, the stage is set for a potential alliance government formation.