ഐ.പി.എല്ലിൽ റോയൽ ചലഞ്ചേഴ്‌സ് ബെംഗളൂരുവിനെതിരെ ലഖ്‌നൗ സൂപ്പർ ജയന്റ്‌സിന് ആവേശകരമായ വിജയം. മഴ വില്ലനായെത്തിയ മത്സരത്തിൽ ഡക്ക്‌വർത്ത് ലൂയിസ് (DLS) നിയമപ്രകാരം ഒമ്പത് റൺസിനാണ് റിഷഭ് പന്തും സംഘവും ആർ.സി.ബിയെ തകർത്തത്. ഈ വിജയത്തോടെ പോയിന്റ് പട്ടികയിൽ ഒന്നാം സ്ഥാനത്തെത്താനുള്ള ബെംഗളൂരുവിന്റെ മോഹങ്ങൾ പൊലിഞ്ഞു.

മത്സരത്തിലെ വിജയത്തിനൊപ്പം നായകൻ റിഷഭ് പന്തിനെ തേടി ഒരു അപൂർവ്വ നേട്ടവുമെത്തി. ഐ.പി.എൽ ചരിത്രത്തിൽ 200-ന് മുകളിൽ ടോട്ടൽ ഏറ്റവും കൂടുതൽ തവണ വിജയകരമായി പ്രതിരോധിച്ച നായകന്മാരുടെ പട്ടികയിൽ രോഹിത് ശർമയ്‌ക്കൊപ്പം പന്ത് ഇടംപിടിച്ചു.

പന്തിന്റെ 'സൂപ്പർ' നേട്ടം

ഐ.പി.എല്ലിൽ ഒരു ക്യാപ്റ്റൻ എന്ന നിലയിൽ 10 തവണയാണ് റിഷഭ് പന്ത് 200 പ്ലസ് ടോട്ടൽ പ്രതിരോധിച്ചു ജയിച്ചത്. ഇതോടെ 10 തവണ ഈ നേട്ടം കൈവരിച്ച രോഹിത് ശർമയ്ക്കൊപ്പമാണ് പന്ത് എത്തിയത്. 18 തവണ ഈ നേട്ടം സ്വന്തമാക്കിയ എം.എസ്. ധോണിയാണ് പട്ടികയിൽ ഒന്നാമൻ.

200+ ടോട്ടൽ ഡിഫൻഡ് ചെയ്ത നായകന്മാർ:

1. എം.എസ്. ധോണി: 18 (വിജയശതമാനം - 86%)
2. വിരാട് കോഹ്‌ലി: 13 (87%)
3. ശ്രേയസ് അയ്യർ: 12 (71%)
4. രോഹിത് ശർമ: 10 (100%)
5. റിഷഭ് പന്ത്: 10 (71%)

മിച്ചൽ മാർഷിന്റെ സെഞ്ച്വറി തിളക്കം

ആദ്യം ബാറ്റ് ചെയ്ത ലഖ്‌നൗ 19 ഓവറിൽ മൂന്ന് വിക്കറ്റ് നഷ്ടത്തിൽ 209 റൺസാണ് അടിച്ചുകൂട്ടിയത്. ഓസ്‌ട്രേലിയൻ താരം മിച്ചൽ മാർഷിന്റെ വെടിക്കെട്ട് സെഞ്ച്വറിയാണ് ലഖ്‌നൗവിനെ കൂറ്റൻ സ്കോറിലേക്ക് നയിച്ചത്. വെറും 56 പന്തിൽ ഒമ്പത് സിക്‌സറും ഒമ്പത് ഫോറും ഉൾപ്പെടെ 111 റൺസാണ് താരം അടിച്ചുകൂട്ടിയത്. നിക്കോളാസ് പൂരൻ (38), റിഷഭ് പന്ത് (32) എന്നിവരും ഭേദപ്പെട്ട പ്രകടനം കാഴ്ചവെച്ചു.

മറുപടി ബാറ്റിങ്ങിൽ ബെംഗളൂരുവിനായി രജത് പാടിദാർ പൊരുതിയെങ്കിലും (31 പന്തിൽ 61) ലക്ഷ്യത്തിലെത്താനായില്ല. ഇംപാക്ട് പ്ലെയറായി എത്തിയ ടിം ഡേവിഡ് 17 പന്തിൽ 40 റൺസെടുത്ത് അവസാന നിമിഷം ഭീതി പരത്തിയെങ്കിലും ലഖ്‌നൗ ബൗളർമാർ വിജയം പിടിച്ചെടുത്തു. ആറ് വിക്കറ്റ് നഷ്ടത്തിൽ 203 റൺസാണ് ആർ.സി.ബിക്ക് നേടാനായത്.

പ്രിൻസ് യാദവിന്റെ ബോളിങ് മാജിക്

ലഖ്‌നൗ നിരയിൽ പ്രിൻസ് യാദവാണ് ആർ.സി.ബിയുടെ നടുവൊടിച്ചത്. വിരാട് കോഹ്‌ലി (0), ദേവ്ദത്ത് പടിക്കൽ (34), ജിതേഷ് ശർമ (1) എന്നിവരുടെ നിർണായക വിക്കറ്റുകൾ പ്രിൻസ് വീഴ്ത്തി. ഷഹബാസ് അഹമ്മദ് രണ്ടും മുഹമ്മദ് ഷമി ഒരു വിക്കറ്റും നേടി.

മെയ് 10-ന് ചെന്നൈ സൂപ്പർ കിങ്‌സിനെതിരെ ചെപ്പോക്കിലാണ് ലഖ്‌നൗവിന്റെ അടുത്ത പോരാട്ടം. അതേ ദിവസം തന്നെ ബെംഗളൂരു മുംബൈ ഇന്ത്യൻസിനെ നേരിടും.