കൊച്ചി: ലോകപ്രശസ്തമായ കൊച്ചി മുസിരിസ് ബിനാലെയുടെ അമരത്തേക്ക് ആദ്യമായി ഒരു വിദേശ ക്യൂറേറ്റര്‍ എത്തുന്നു. ഏഴാം പതിപ്പിന്റെ ക്യൂറേറ്ററായി പ്രശസ്ത ഫ്രഞ്ച് കലാകാരന്‍ കാദര്‍ അത്തിയയെയാണ് തിരഞ്ഞെടുത്തിരിക്കുന്നത്. വെനീസില്‍ വച്ച് നടന്ന ചടങ്ങില്‍ ബിനാലെ പ്രസിഡന്റ് ജിതീഷ് കല്ലാട്ടാണ് ഈ സുപ്രധാന പ്രഖ്യാപനം നടത്തിയത്.

ആരാണ് കാദര്‍ അത്തിയ?

നരവംശ ശാസ്ത്രവും ദര്‍ശനങ്ങളും കലയുമായി കോര്‍ത്തിണക്കി വിസ്മയങ്ങള്‍ തീര്‍ക്കുന്ന കലാകാരനാണ് 1970ല്‍ ഫ്രാന്‍സില്‍ ജനിച്ച കാദര്‍ അത്തിയ. ചരിത്രം, സ്മരണകള്‍ എന്നിവ പ്രമേയമാക്കിയുള്ള അദ്ദേഹത്തിന്റെ ഇന്‍സ്റ്റലേഷനുകളും സിനിമകളും ആഗോളതലത്തില്‍ ശ്രദ്ധേയമാണ്. നിലവില്‍ ഹാംബര്‍ഗ് യൂണിവേഴ്‌സിറ്റി ഓഫ് ഫൈന്‍ ആര്‍ട്‌സിലെ പ്രൊഫസറായ അദ്ദേഹം 2014ലെ രണ്ടാം ബിനാലെയില്‍ കലാകാരനായി പങ്കെടുത്തിരുന്നു.

ശില്‍പ ഗുപ്ത, അമൃത ഝാവേരി തുടങ്ങിയ പ്രമുഖരടങ്ങുന്ന സമിതിയാണ് അത്തിയയെ തിരഞ്ഞെടുത്തത്. 2027 ഡിസംബര്‍ 12നാണ് ബിനാലെയുടെ ഏഴാം പതിപ്പിന് തുടക്കമാകുന്നത്. തന്റെ പഴയ സ്വപ്നം യാഥാര്‍ഥ്യമായെന്നും സാംസ്‌കാരിക വൈവിധ്യങ്ങളുടെ നഗരമായ കൊച്ചിയില്‍ ക്യൂറേറ്ററായി എത്തുന്നതില്‍ അതിയായ സന്തോഷമുണ്ടെന്നും കാദര്‍ അത്തിയ പ്രതികരിച്ചു.

Renowned French artist Kader Attia has been named the curator for the 7th edition of the Kochi-Muziris Biennale, scheduled to begin on December 12, 2027.