അബുദബി: താൽക്കാലിക ഇടവേളയ്ക്ക് ശേഷം യുഎഇയിലെ സ്കൂളുകൾ വീണ്ടും തുറക്കുന്നു. നാളെ (മെയ് 11 തിങ്കളാഴ്ച) മുതൽ രാജ്യത്തുടനീളമുള്ള സ്കൂളുകളിൽ നേരിട്ടുള്ള പഠനരീതി പുനരാരംഭിക്കുമെന്ന് വിദ്യാഭ്യാസ മന്ത്രാലയം അറിയിച്ചു. വിദൂര പഠന സംവിധാനത്തിൽ നിന്ന് വിദ്യാർത്ഥികൾ കാമ്പസുകളിലേക്ക് മടങ്ങിയെത്തും.

നിലവിലെ സാഹചര്യങ്ങൾ കൃത്യമായി വിലയിരുത്തിയ ശേഷമാണ് വിദ്യാഭ്യാസ മന്ത്രാലയം ഈ തീരുമാനമെടുത്തിരിക്കുന്നത്. വിദ്യാർഥി സമൂഹത്തിന്റെ സുരക്ഷയും അതോടൊപ്പം തന്നെ പഠന പ്രക്രിയയുടെ തടസ്സമില്ലാത്ത തുടർച്ചയും ഉറപ്പാക്കാൻ ലക്ഷ്യമിട്ടാണ് അധികൃതരുടെ നീക്കം. ബന്ധപ്പെട്ട മറ്റ് സർക്കാർ വകുപ്പുകളുമായി ഏകോപിപ്പിച്ച് സാഹചര്യം നിരീക്ഷിച്ച ശേഷം ഞായറാഴ്ച വൈകുന്നേരമാണ് മന്ത്രാലയം അന്തിമ പ്രഖ്യാപനം നടത്തിയത്.

ALSO READ: പഴമയുടെ തണലില്‍ 'അല്‍ ജത്ത'; അബൂദബിയിലെ ഏറ്റവും പ്രായം കൂടിയ സിദ്‌റ മരം പൈതൃക സ്മാരകം

വിദ്യാഭ്യാസ മന്ത്രാലയത്തിന്റെ പ്രഖ്യാപനത്തിന് പിന്നാലെ ദുബൈയിലെ നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റിയും (KHDA) ഇമാറാത്തിലെ സ്കൂളുകൾ നേരിട്ടുള്ള പഠനത്തിലേക്ക് മാറുമെന്ന് വ്യക്തമാക്കി. ഇതോടെ യുഎഇയിലുടനീളമുള്ള ആയിരക്കണക്കിന് വിദ്യാർത്ഥികൾക്ക് തിങ്കളാഴ്ച മുതൽ വീണ്ടും ക്ലാസ് മുറികളിലിരുന്ന് പഠിക്കാനുള്ള അവസരം ലഭിക്കും.

നേരത്തെ സോഷ്യൽ മീഡിയ പ്ലാറ്റ്‌ഫോമുകളിലൂടെ നൽകിയ സൂചനകൾക്ക് പിന്നാലെയാണ് ഇപ്പോൾ കൃത്യമായ സ്ഥിരീകരണം വന്നിരിക്കുന്നത്. സ്കൂളുകൾ തുറക്കുന്നതോടെ വിദ്യാർത്ഥികളെ വരവേൽക്കാനുള്ള ഒരുക്കങ്ങൾ രാജ്യത്തെ വിദ്യാഭ്യാസ സ്ഥാപനങ്ങളിൽ പുരോ​ഗമിക്കുകയാണ്.

Schools across the UAE will resume in-person classes from tomorrow as campuses reopen, allowing students and teachers to return to regular academic schedules.