തലശ്ശേരി: കഴിഞ്ഞ ആറു വര്‍ഷക്കാലമായി തലശ്ശേരിയിലും പരിസര പ്രദേശങ്ങളിലുമുള്ള യുവാക്കള്‍ക്ക് ആര്‍മിയിലേക്ക് പ്രവേശനം ലഭിക്കാന്‍ സൗജന്യമായി കായിക പരിശീലനവും എഴുത്തു പരീക്ഷക്കാവശ്യമായ ക്ലാസുകളും നല്‍കിവരുന്ന ബ്രണ്ണന്‍ കോളജ് എക്‌സ് എന്‍.സി.സി അസോസിയേഷന്‍ (ബ്രെക്‌സ)യിലൂടെ വീണ്ടും 42 യുവാക്കള്‍ക്ക് പട്ടാളത്തില്‍ പ്രവേശനം. ഇതോടെ ബ്രെക്‌സയിലൂടെ പട്ടാളത്തിലെത്തിയ യുവാക്കളുടെ എണ്ണം 906 ആയി. പൂര്‍ണമായും സൗജന്യമായാണ് ഇവിടു ക്ലാസുകള്‍ നല്‍കിവരുന്നത്.
പുതുതായി സൈന്യത്തില്‍ പ്രവേശനം ലഭിച്ചവരെ അഭിനന്ദിക്കാന്‍ ഗവ.ബ്രണ്ണന്‍ കോളജ് സെമിനാര്‍ ഹാളില്‍ ചേര്‍ന്ന യോഗം ധര്‍മടം ഗ്രാമ പഞ്ചായത്ത് പ്രസിഡണ്ട് ബേബി സരോജം ഉദ്ഘാടനം ചെയ്തു.
ബ്രക്‌സ പ്രസിഡണ്ട് കേണല്‍ ബി.കെ നായര്‍ അധ്യക്ഷനായി. സെക്രട്ടറി മേജര്‍ പി ഗോവിന്ദന്‍, ലഫ്.കേണല്‍ എം.കെ ശശിധരന്‍, കെ.വി ഗോകുല്‍ദാസ്, എം ശ്രീജിത്ത്, ബി സിറാജുദ്ദീന്‍, മുഹമ്മദ് റാഫി, എം.കെ ബാലചന്ദ്രന്‍ സംസാരിച്ചു.
അനുമോദന യോഗത്തിന് ശേഷം തലശ്ശേരി സമരിറ്റന്‍ ഹോം വൃദ്ധ മന്ദിരത്തിലേക്കായി യുവാക്കള്‍ സ്വരൂപിച്ച സഹായധനം കേണല്‍ ബി.കെ നായര്‍ വൃദ്ധ സദനം ഭാരവാഹികള്‍ക്ക് കൈമാറി. അന്തേവാസികള്‍ക്കൊപ്പം ഭക്ഷണം കഴിച്ചും ആഹ്ലാദം പങ്കിട്ടുമാണ് യുവാക്കള്‍ തിരിച്ചുപോയത്.