കോഴിക്കോട്: താമരശ്ശേരിയില്‍ ഓട്ടോ ഡ്രൈവര്‍ പഞ്ചായത്ത് ഒഫിസില്‍ തൂങ്ങിമരിച്ച നിലയില്‍. വായ്പാ കുടിശ്ശികയുമായി ബന്ധപ്പെട്ട തര്‍ക്കങ്ങള്‍ക്കും ഭീഷണികള്‍ക്കും പിന്നാലെയാണ് താമരശ്ശേരിയില്‍ ഓട്ടോ ഡ്രൈവറെ മരിച്ച നിലയില്‍ കണ്ടെത്തിയത്. താമരശ്ശേരി സ്വദേശി മുരളീധരനെ (56) ആണ് താമരശ്ശേരി പഞ്ചായത്ത് ഓഫിസിന്റെ ഗോവണിപ്പടിയില്‍ തൂങ്ങിമരിച്ച നിലയില്‍ കണ്ടെത്തിയത്. പഞ്ചായത്ത് ഓഫിസിന് സമീപം തന്നെ ഇദ്ദേഹത്തിന്റെ ഓട്ടോറിക്ഷ പാര്‍ക്ക് ചെയ്ത നിലയിലുണ്ട്.

വായ്പാ തിരിച്ചടവ് മുടങ്ങിയതിനെ തുടര്‍ന്ന് സ്വകാര്യ ധനകാര്യ സ്ഥാപനത്തില്‍ നിന്നുള്ള ജീവനക്കാര്‍ മുരളീധരനെ ഭീഷണിപ്പെടുത്തിയിരുന്നതായി സുഹൃത്തുക്കള്‍ ആരോപിക്കുന്നു. കഴിഞ്ഞ ദിവസം ഓട്ടോ സ്റ്റാന്‍ഡിലെത്തിയ ബജാജ് ഫൈനാന്‍സ് ജീവനക്കാര്‍, പണം ഉടന്‍ അടയ്ക്കാമെന്ന് പറഞ്ഞിട്ടും വഴങ്ങാതെ ഭീഷണി മുഴക്കിയാണ് മടങ്ങിയതെന്ന് സഹപ്രവര്‍ത്തകര്‍ പറഞ്ഞു. ഇതില്‍ മനംനൊന്താണ് മുരളീധരന്‍ ആത്മഹത്യ ചെയ്തതെന്നാണ് പ്രാഥമിക നിഗമനം.

സംഭവത്തില്‍ പൊലിസ് അന്വേഷണം ആരംഭിച്ചിട്ടുണ്ട്. ധനകാര്യ സ്ഥാപന ജീവനക്കാര്‍ക്കെതിരെയുള്ള ആരോപണങ്ങള്‍ ഗൗരവമായി പരിശോധിക്കുമെന്ന് താമരശ്ശേരി പൊലിസ് അറിയിച്ചു. ഇന്‍ക്വസ്റ്റ് നടപടികള്‍ പൂര്‍ത്തിയാക്കിയ ശേഷം മൃതദേഹം പോസ്റ്റുമോര്‍ട്ടത്തിനായി കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി.

A 56-year-old auto-driver was found dead at the Thamarassery Panchayat office in Calicut, following alleged threats and harassment from finance company officials over defaulted loan repayments.