കൊച്ചി: ജോലി തേടി കൊച്ചിയിലെത്തിയ കാസര്‍കോഡ് സ്വദേശിനി വാഹനാപകടത്തില്‍ മരിച്ചു. നെടുമ്പാശ്ശേരി വിമാനത്താവള റോഡില്‍ പുലര്‍ച്ചെയുണ്ടായ അപകടത്തില്‍ കാസര്‍കോഡ് ചെര്‍ളടുക്ക സ്വദേശിനി ഇഷാന ഇസ്മത് (21) ആണ് മരിച്ചത്. അത്താണിയിലെ പെട്രോള്‍ പമ്പിന് സമീപത്തെ വളവില്‍ വച്ച് ഇഷാന സഞ്ചരിച്ചിരുന്ന ബൈക്കിന് പിന്നില്‍ അതിവേഗത്തിലെത്തിയ സ്വിഫ്റ്റ് കാര്‍ ഇടിക്കുകയായിരുന്നു.

അരൂര്‍ സ്വദേശിയായ 17കാരനാണ് അപകടസമയത്ത് കാര്‍ ഓടിച്ചിരുന്നതെന്ന് പൊലിസ് കണ്ടെത്തി. അത്താണിയില്‍ ബന്ധുവിന്റെ വിവാഹത്തിനെത്തിയതായിരുന്നു ഇയാള്‍. അപകടത്തിന് ശേഷം കാര്‍ നിര്‍ത്താതെ പോയതായി ദൃക്‌സാക്ഷികള്‍ പറഞ്ഞു. ബൈക്ക് ഓടിച്ചിരുന്ന ഇഷാനയുടെ സുഹൃത്ത് സര്‍ഫാത്ത് പരിക്കുകളോടെ ചികിത്സയിലാണ്.

കാസര്‍കോട് യുനൈറ്റഡ് മെഡിക്കല്‍ സെന്ററിലെ ജീവനക്കാരിയായിരുന്ന ഇഷാന, പുതിയ ജോലി സംബന്ധമായ ആവശ്യങ്ങള്‍ക്കായാണ് എറണാകുളത്തെത്തിയത്. മൃതദേഹം അങ്കമാലി താലൂക്ക് ആശുപത്രിയിലെ നടപടികള്‍ക്ക് ശേഷം നാട്ടിലേക്ക് കൊണ്ടുപോകും. പരേതനായ അബൂബക്കറിന്റെയും നഫീസയുടെയും മകളാണ് ഇഷാന.

 Ishana Ismath, a 21-year-old job seeker from Kasaragod, lost her life in Nedumbassery when a speeding car driven by an underage boy hit the motorcycle she was travelling on.