തിരുവനന്തപുരം: ഈ വര്‍ഷത്തെ എസ്എസ്എല്‍സി പരീക്ഷാ ഫലം മെയ് 15 വെള്ളിയാഴ്ച തന്നെ ഉണ്ടായേക്കുമെന്ന് സൂചന. മൂല്യനിര്‍ണ്ണയവും മറ്റ് അനുബന്ധ നടപടികളും ഇതിനോടകം പൂര്‍ത്തിയായിട്ടുണ്ട്. ഫലപ്രഖ്യാപനത്തിന് മുന്നോടിയായി ഫലം വിലയിരുത്തുന്നതിനായി പരീക്ഷാ ബോര്‍ഡ് ഇന്ന് നിര്‍ണ്ണായക യോഗം ചേരും. ഈ യോഗത്തിന് ശേഷമായിരിക്കും ഔദ്യോഗിക പ്രഖ്യാപനം ഉണ്ടാവുക.

നേരത്തെ നിശ്ചയിച്ചിരുന്നത് പോലെ തന്നെ 15ാം തിയതി ഫലം പ്രസിദ്ധീകരിക്കാനാണ് വിദ്യാഭ്യാസ വകുപ്പിന്റെ നീക്കം. പരീക്ഷാ ബോര്‍ഡ് യോഗത്തിന് ശേഷം സാങ്കേതിക നടപടികള്‍ പൂര്‍ത്തിയാക്കാന്‍ ഒരു ദിവസം കൂടി ആവശ്യമാണ്. ഇതിനാലാണ് യോഗം ബുധനാഴ്ച തന്നെ നിശ്ചയിച്ചത്. വെള്ളിയാഴ്ച ഫലം പ്രസിദ്ധീകരിക്കാനുള്ള എല്ലാ ക്രമീകരണങ്ങളും പരീക്ഷാ ഭവന്‍ സജ്ജമാക്കിയിട്ടുണ്ട്.

സംസ്ഥാനത്ത് പുതിയ സര്‍ക്കാര്‍ അധികാരമേല്‍ക്കുന്നതിലെ കാലതാമസം കാരണം ഇത്തവണ ഫലപ്രഖ്യാപനം ഉദ്യോഗസ്ഥര്‍ നിര്‍വ്വഹിക്കാനാണ് സാധ്യത. സാധാരണ നിലയില്‍ വിദ്യാഭ്യാസമന്ത്രിയാണ് ഫലം പ്രഖ്യാപിക്കാറുള്ളത്. എന്നാല്‍ നിലവിലെ പ്രത്യേക സാഹചര്യം കണക്കിലെടുത്ത് ചീഫ് സെക്രട്ടറിയോ പൊതുവിദ്യാഭ്യാസ ഡയറക്ടറോ ആയിരിക്കും ഇക്കുറി ഫലം അറിയിക്കുക. 2021ലെ തിരഞ്ഞെടുപ്പ് കാലത്തും സമാനമായ രീതിയില്‍ ഉദ്യോഗസ്ഥരായിരുന്നു ഫലപ്രഖ്യാപനം നടത്തിയത്.

The Kerala SSLC exam results are expected to be announced this Friday, with officials likely handling the declaration due to the current transition in government.