ലഖ്‌നൗ: ഉത്തര്‍പ്രദേശില്‍ നാശം വിതച്ച് വീശിയടിച്ച ചുഴലിക്കാറ്റിലും കനത്ത മഴയിലും വ്യാപക നാശനഷ്ടം. ബറേലി ജില്ലയില്‍ കനത്ത കാറ്റില്‍ പറന്നുപോയ ടിന്‍ ഷീറ്റില്‍ പിടിമുറുക്കിയ യുവാവ് വായുവിലേക്ക് ഉയര്‍ന്നുപോയത് വലിയ ഞെട്ടലുണ്ടാക്കി. 

കല്യാണ മണ്ഡപത്തില്‍ നില്‍ക്കുകയായിരുന്ന ഇയാള്‍ മേല്‍ക്കൂര തകര്‍ന്നപ്പോള്‍ അതില്‍ പിടിച്ചുനില്‍ക്കുകയായിരുന്നു. ശക്തമായ കാറ്റില്‍ ഷീറ്റ് വായുവിലേക്ക് ഉയര്‍ന്നതോടെ യുവാവും അതിനൊപ്പം പൊങ്ങിപ്പോവുകയായിരുന്നു.

കുറച്ചകലെയുള്ള ഒരു പാടത്തേക്കാണ് യുവാവ് വന്നു വീണത്. വീഴ്ചയുടെ ആഘാതത്തില്‍ ഇരു കൈകാലുകള്‍ക്കും ഗുരുതരമായി പരിക്കേറ്റ ഇയാളെ നിലവില്‍ ആശുപത്രിയില്‍ പ്രവേശിപ്പിച്ചിരിക്കുകയാണ്.

സംസ്ഥാനത്തിന്റെ വിവിധ ഭാഗങ്ങളിലുണ്ടായ ഇടിമിന്നലിലും ചുഴലിക്കാറ്റിലും പെട്ട് ഇതുവരെ എഴുപതിലധികം പേര്‍ മരണപ്പെട്ടതായാണ് ഔദ്യോഗിക റിപ്പോര്‍ട്ടുകള്‍. നിരവധി സ്ഥലങ്ങളില്‍ മരങ്ങള്‍ കടപുഴകിയും വീടുകള്‍ തകര്‍ന്നും ആളുകള്‍ക്ക് പരിക്കേറ്റിട്ടുണ്ട്. കൃഷിയും വൈദ്യുതി ബന്ധങ്ങളും പൂര്‍ണമായി തകരാറിലായി.

ദുരന്തബാധിതര്‍ക്ക് 24 മണിക്കൂറിനുള്ളില്‍ അടിയന്തര ധനസഹായം എത്തിക്കാന്‍ മുഖ്യമന്ത്രി യോഗി ആദിത്യനാഥ് ഉദ്യോഗസ്ഥര്‍ക്ക് നിര്‍ദേശം നല്‍കി. മരണപ്പെട്ടവരുടെ കുടുംബങ്ങള്‍ക്കും കന്നുകാലികള്‍ നഷ്ടപ്പെട്ടവര്‍ക്കും വീട് തകര്‍ന്നവര്‍ക്കും കൃത്യമായ നഷ്ടപരിഹാരം ഉറപ്പാക്കണം. 

ജില്ലാ ഭരണകൂടങ്ങള്‍ ദുരന്തബാധിത പ്രദേശങ്ങളില്‍ നേരിട്ടെത്തി ആവശ്യമായ സഹായങ്ങള്‍ ചെയ്യണമെന്നും ഇതില്‍ വീഴ്ച വരുത്തുന്ന ജീവനക്കാര്‍ക്കെതിരെ കര്‍ശന നടപടിയുണ്ടാകുമെന്നും മുഖ്യമന്ത്രി വ്യക്തമാക്കി.

Over 70 people lost their lives in a massive storm in Uttar Pradesh, where a young man in Bareilly sustained severe injuries after being lifted into the air by a flying tin sheet.