കോഴിക്കോട്: സംസ്ഥാന സബ്ജൂനിയര്‍ ഫുട്‌ബോള്‍ ടൂര്‍ണമെന്റില്‍ പങ്കെടുക്കാനുള്ള ജില്ലാ ടീമിനെ തിരഞ്ഞെടുക്കാനായി നടത്തുന്ന ജില്ലാ ഫുട്‌ബോള്‍ ടൂര്‍ണമെന്റിന് കോര്‍പറേഷന്‍ സ്റ്റേഡിയത്തില്‍ തുടക്കമായി. ഇന്നലെ നടന്ന ലീഗ് മത്സരങ്ങളില്‍ ബേപ്പൂര്‍ റോയല്‍ സ്‌പോര്‍ട്‌സ് ക്ലബ്, എച്ച്.എം.സി.എ കാലിക്കറ്റ്, അല്‍ഫാറൂഖ് എച്ച്.എസ് ഫറോക്ക്, കല്ലനോട് സെന്റ് മേരീസ് എച്ച്.എസ് എന്നീ ടീമുകള്‍ ക്വാര്‍ട്ടര്‍ ഫൈനലിലേക്കു യോഗ്യത നേടി.
ഇന്നു രാവിലെ ഏഴിനു നടക്കുന്ന ആദ്യമത്സരത്തില്‍ ഗവ. വി.എച്ച്.എസ് മീഞ്ചന്ത, കെ.എഫ്.ടി.സിയെ നേരിടും. ബേപ്പൂര്‍ ഫുട്‌ബോള്‍ അക്കാദമി, വി.പി സത്യന്‍ സോക്കര്‍ സ്‌കൂള്‍, കടത്തനാട് രാജ ഫുട്‌ബോള്‍ അക്കാദമി, ക്രസന്റ് ഫുട്‌ബോള്‍ അക്കാദമി, കുന്ദമംഗലം എഫ്.സി, റിയല്‍ ഷൂട്ടേഴ്‌സ് കൊയിലാണ്ടി, യൂനിറ്റി എഫ്.സി ബേപ്പൂര്‍, എം.എം.വി.എച്ച്.എസ് പരപ്പില്‍ എന്നീ ടീമുകളും ഇന്നു മാറ്റുരക്കും.
ക്വാര്‍ട്ടര്‍ ഫൈനല്‍ മത്സരങ്ങള്‍ നാളെ രാവിലെ നടക്കും.