നിലമ്പൂർ: രാജ്യത്ത്  സെൻസസ് നടക്കുന്നതിൻ്റെ  മറവിൽ സൈബർ തട്ടിപ്പ് നടക്കുന്നതായി പൊലിസിന്റെ മുന്നറിയിപ്പ്. സെൻസസിന്റെ പേരിൽ തട്ടിപ്പുകാർ വ്യാജ കോളുകൾ, സന്ദേശങ്ങൾ, പരിശോധനാ ലിങ്കുകൾ എന്നിവ ഉപയോഗിച്ച് ജനങ്ങളെ ലക്ഷ്യമിടുകയാണെന്ന് പൊലിസ് സൈബർ സെൽ മുന്നറിയിപ്പ് നൽകി. ഔദ്യോഗികമായ സെൻസസ് വിവരണ ശേഖരണത്തിന്റെ ഭാഗമായി അധികൃതർ ഒരിക്കലും ഒ.ടി.പി, ബാങ്ക് വിവരങ്ങൾ, ആധാർ നമ്പർ, പാൻ നമ്പർഎന്നിവ ആവശ്യപ്പെടില്ല.

സെൻസസ് പ്രക്രിയയിൽ നിർബന്ധമായും പങ്കെടുക്കണമെന്നാണ് സന്ദേശം വരിക. സന്ദേശത്തിനൊപ്പം ഒരു ലിങ്കും നൽകും. ഇതിൽ ക്ലിക്ക് ചെയ്‌താൽ സെൻസസ് സൈറ്റ് പോലെ തോന്നിപ്പിക്കുന്ന വ്യാജ വെബ്സൈറ്റിലെത്തും. ഇതിൽ കയറിയാൽ സെൻസസ് പ്രോസസിങ് ചാർജായി പണം അടയ്ക്കാൻ ആവശ്യപ്പെടും. പണം അടച്ചാൽ പിന്നെ തട്ടിപ്പുകാരന്റെ പൊടിപോലുമുണ്ടാകില്ല. 

വിവരശേഖരണത്തിന്റെ ഭാഗമായി വിളിക്കുകയാണെന്നും ബാങ്ക് അക്കൗണ്ട് വിവരങ്ങൾ ഉൾപ്പെടെ വേണമെന്നുമാണ് തട്ടിപ്പുകാർ ഫോൺ കോളിലൂടെ ആവശ്യപ്പെടുക. ഫോണിലേക്കെത്തുന്ന ഒ.ടി.പി വേണമെന്നും പറയും. ഒ.ടി.പി നൽകുന്നതോടെ അക്കൗണ്ടിലെ പണം തട്ടിപ്പുകാരുടെ കൈയിലെത്തും. അതിനാൽ അപരിചിത കോളുകൾക്ക് ഒരിക്കലും വ്യക്തി വിവരങ്ങളോ ഒ.ടി.പിയോ നൽകരുതെന്ന് പൊലിസ് മുന്നറിയിപ്പ് നൽകുന്നു