വടകര: കളഞ്ഞുകിട്ടിയ എ.ടി.എം കാര്‍ഡ് ഉപയോഗിച്ച് പണം പിന്‍വലിച്ച സംഭവത്തില്‍ പ്രതികളിലൊരാളെ വടകര പൊലിസ് പിടികൂടി. തിരുവള്ളൂര്‍ പഞ്ചായത്തിലെ ചെമ്മരത്തൂര്‍ സ്വദേശി കുന്നിയുള്ളതില്‍ റോഷിത്തിന്റെ നഷ്ടപ്പെട്ട എ.ടി.എം കാര്‍ഡ് ഉപയോഗിച്ചു പണം തട്ടിയെടുത്തെന്ന പരാതിയിലാണ് തിരുവള്ളൂര്‍ സ്വദേശി കുഞ്ഞമ്മദിനെ (40) വടകര എസ്.ഐ എ.ജി വിപിന്‍ അറസ്റ്റ് ചെയ്തത്.
കഴിഞ്ഞ അഞ്ചിനാണ് റോഷിത്തിന്റെ എ.ടി.എം കാര്‍ഡ് നഷ്ടപ്പെട്ടത്. പ്രതികള്‍ ഈ കാര്‍ഡ് ഉപയോഗിച്ച് കോര്‍പറേഷന്‍ ബാങ്കിന്റെ തിരുവള്ളൂര്‍ ബ്രാഞ്ചില്‍ സ്ഥാപിച്ച എ.ടി.എം കൗണ്ടറില്‍ നിന്ന് 5,000 രൂപ പിന്‍വലിക്കുകയായിരുന്നു. എ.ടി.എം കൗണ്ടറില്‍ സ്ഥാപിച്ച സി.സി.ടി.വി കാമറയിലെ ദൃശ്യം പരിശോധിച്ചതില്‍ നിന്നാണ് പ്രതികളെ തിരിച്ചറിയാന്‍ കഴിഞ്ഞത്. കൂട്ടുപ്രതിയായ ഹനീഫക്കു വേണ്ടി അന്വേഷണം ഊര്‍ജിതമാക്കിയതായി പൊലിസ് അറിയിച്ചു. ഇയാള്‍ തിരുവള്ളൂരിലെ മണല്‍ക്കടത്തുമായി ബന്ധപ്പെട്ടും മറ്റും നിരവധി കേസുകളില്‍ പ്രതിയാണെന്ന് പൊലിസ് പറഞ്ഞു.