ന്യൂഡല്‍ഹി ലഖ്‌നോ സര്‍വകലാശാലയിലെ വിദ്യാര്‍ഥിനിയോട് അപമര്യാദയായി പെരുമാറിയ കേസില്‍ അസിസ്റ്റന്റ് പ്രൊഫസറെ പൊലീസ് അറസ്റ്റ് ചെയ്തു. സുവോളജി വിഭാഗത്തിലെ അധ്യാപകനായ പരംജീത് സിങ്ങിനെതിരെയാണ് നടപടി. പരീക്ഷാ ചോദ്യപേപ്പര്‍ നല്‍കാമെന്ന് വാഗ്ദാനം ചെയ്ത് വിദ്യാര്‍ഥിനിയെ വീട്ടിലേക്ക് വിളിക്കുകയും ലൈംഗിക ബന്ധത്തിന് നിര്‍ബന്ധിക്കുകയും ചെയ്‌തെന്ന ആരോപണമാണ് ഉയര്‍ന്നിരിക്കുന്നത്.

അവസാന വര്‍ഷ ബി.എസ്.സി വിദ്യാര്‍ഥിനിയുമായി നടത്തിയ ഫോണ്‍ സംഭാഷണത്തിന്റെ ഓഡിയോ പുറത്തുവന്നതോടെയാണ് സംഭവം വിവാദമായത്. ''നിനക്കായി പരീക്ഷാ ചോദ്യപേപ്പര്‍ സംഘടിപ്പിച്ചിട്ടുണ്ടെന്നും വീട്ടിലെത്തിയാല്‍ നല്‍കാമെന്നും'' അധ്യാപകന്‍ പറയുന്ന ശബ്ദരേഖയാണ് പുറത്തുവന്നത്. രണ്ട് ചോദ്യപേപ്പറുകള്‍ കൈവശമുണ്ടെന്നും എപ്പോഴാണ് വീട്ടിലെത്തുകയെന്നും ഇയാള്‍ വിദ്യാര്‍ഥിനിയോട് ചോദിക്കുന്നതായും ഓഡിയോയില്‍ കേള്‍ക്കാം.

ALSO READ: നീറ്റ് ക്രമക്കേട്; എന്‍.ടി.എ പിരിച്ചുവിടണമെന്ന് ആവശ്യപ്പെട്ട് സുപ്രീംകോടതിയില്‍ ഹരജി

എന്നാല്‍ താന്‍ സിലബസ് മുഴുവന്‍ പഠിച്ചിട്ടുണ്ടെന്നും ചോദ്യപേപ്പറിന്റെ ആവശ്യമില്ലെന്നുമാണ് വിദ്യാര്‍ഥിനി മറുപടി നല്‍കിയത്. തുടര്‍ന്ന് പലതവണ വീട്ടിലെത്താന്‍ നിര്‍ബന്ധിച്ചുവെന്നും അവധിക്കാലത്തുപോലും നിരന്തരം വിളിച്ചുവെന്നും വിദ്യാര്‍ഥിനി പരാതിപ്പെട്ടു.

മാനസികമായി തളര്‍ന്ന വിദ്യാര്‍ഥിനി സര്‍വകലാശാല അധികൃതരെ വിവരം അറിയിച്ചതിനെ തുടര്‍ന്ന് പരീക്ഷാ കണ്‍ട്രോളര്‍ പൊലീസില്‍ ഔദ്യോഗിക പരാതി നല്‍കുകയായിരുന്നു. ഫോണ്‍ സംഭാഷണത്തിന്റെ രേഖകളും പൊലീസിന് കൈമാറി.
ലക്‌നോ സര്‍വകലാശാല അധികൃതര്‍ സംഭവത്തില്‍ അന്വേഷണം ആരംഭിച്ചിട്ടുണ്ട്. വൈസ് ചാന്‍സലര്‍ ഇന്റേണല്‍ കംപ്ലയിന്‍സ് കമ്മിറ്റിയോട് 24 മണിക്കൂറിനകം റിപ്പോര്‍ട്ട് സമര്‍പ്പിക്കാന്‍ നിര്‍ദേശം നല്‍കിയിട്ടുണ്ട്.

അതേസമയം, ആരോപണങ്ങള്‍ പരംജീത് സിങ് നിഷേധിച്ചു. സര്‍വകലാശാലയിലെ ആഭ്യന്തര രാഷ്ട്രീയത്തിന്റെ ഭാഗമായാണ് തനിക്കെതിരെ കള്ളക്കേസ് ചുമത്തിയതെന്നാണ് അധ്യാപകന്റെ വാദം. സംഭവത്തില്‍ അധ്യാപകനെ പുറത്താക്കണമെന്നാവശ്യപ്പെട്ട് വിദ്യാര്‍ഥി സംഘടനകളും രംഗത്തെത്തിയിട്ടുണ്ട്.