ഗാന്ധിനഗര്‍:  വാടക നല്‍കാന്‍ പണമില്ലാതായതോടെ ഭാര്യയെയും പ്രായപൂര്‍ത്തിയാകാത്ത മകളെയും ബലാത്സംഗം ചെയ്യാന്‍ വീട്ടുടമയ്ക്കും ബന്ധുവിനും വിട്ടുനല്‍കിയയാള്‍ അറസ്റ്റില്‍. ഗുജറാത്തിലെ മോര്‍ബിയിലാണ് സംഭവം.

സുരേന്ദ്രനഗര്‍ സ്വദേശികളായ കുടുംബം ഉപജീവനമാര്‍ഗം തേടിയാണ് ആറു മാസം മുന്‍പ് മോര്‍ബിയിലേക്ക് താമസം മാറിയത്. പ്രതിമാസം 2,000 രൂപ വാടകയുള്ള ഒരു മുറിയിലാണ് ഇവര്‍ താമസിച്ചിരുന്നത്. എന്നാല്‍, കടുത്ത സാമ്പത്തിക പ്രതിസന്ധിയെ തുടര്‍ന്ന് കഴിഞ്ഞ നാല് മാസത്തെ വാടക കുടിശ്ശികയായി. ഇതോടെ മറ്റുവഴികളില്ലെന്ന് കരുതിയ സാഹചര്യത്തിലാണ് വാടകയ്ക്ക് പകരമായി ഭാര്യയെയും മകളെയും ലൈംഗികമായി പീഡിപ്പിക്കാന്‍ വീട്ടുടമസ്ഥനുമായി ഇയാള്‍ കരാറുണ്ടാക്കിയത്. 

അതേസമയം ഭാര്യയുടെ അമ്മ ഇക്കാര്യം അറിഞ്ഞതോടെ അവര്‍ മോര്‍ബി പൊലീസ് സ്റ്റേഷനില്‍ പരാതി നല്‍കി. തുടര്‍ന്ന് പോക്‌സോ നിയമം ഉള്‍പ്പെടെയുള്ള കര്‍ശനമായ വകുപ്പുകള്‍ ചുമത്തി പൊലീസ് കേസെടുത്തു. പെണ്‍കുട്ടിയുടെ പിതാവിനെയും വീട്ടുടമസ്ഥനെയും അറസ്റ്റ് ചെയ്തു.