വെഞ്ഞാറമൂട്: കാല്‍നടയാത്രികയില്‍നിന്നു പണവും രേഖകളും അടങ്ങിയ ബാഗ് തട്ടിയെടുത്തയാള്‍ നാട്ടുകാരുടെ തിരച്ചിലിനൊടുവില്‍ പിടിയിലായി.
മണലിമുക്ക് വടക്കനാട് എസ്.എല്‍ വില്ലയില്‍ ലുബൂദയുടെ ബാഗാണ് നഷ്ടമായത്. സംഭവത്തില്‍ ആലുന്തറ സ്വദേശിയായ ലിജു (31) പിടിയിലായി. കഴിഞ്ഞദിവസം ഉച്ചയ്ക്ക് ഒന്നിന് വെഞ്ഞാറമൂട് സുഹാസ് ഓഡിറ്റോറിയത്തിനു സമീപം വടക്കനാട് റോഡിലായിരുന്നു സംഭവം. ആശുപത്രിയില്‍പോയ ശേഷം വീട്ടിലേക്കു മടങ്ങുകയായിരുന്ന ലുബൂദയില്‍നിന്നു സമീപത്തെ വാഴത്തോട്ടത്തില്‍ ഒളിച്ചിരുന്ന ലിജു ബാഗ് തട്ടിയെടുത്ത് കടക്കുകയായിരുന്നു. തുടര്‍ന്ന് സ്ഥലത്തെത്തിയ നാട്ടുകാര്‍ പൊലിസില്‍ വിവരമറിയിച്ചുവെങ്കിലും ഒരുമണിക്കൂര്‍ കഴിഞ്ഞിലും പൊലിസ് സ്ഥലത്തെത്തിയില്ല. തുടര്‍ന്ന് നാട്ടുകാര്‍ തിരച്ചില്‍ നടത്തി.
ഇതിനൊടുവില്‍ വെഞ്ഞാറമൂട് ചന്ത മക്കാംകോണം റോഡില്‍ മൈലയ്ക്കല്‍ മക്കാംകോണം കാവിനു സമീപം സംശയകരമായ നിലയില്‍ ലുബൂദ പറഞ്ഞ അടയാളങ്ങളോടുകൂടിയ ഒരു യുവാവിനെക്കണ്ടു. നാട്ടുകാര്‍ പിടികൂടുമെന്നായപ്പോള്‍ യുവാവ് ഓടിരക്ഷപ്പെടാന്‍ ശ്രമിച്ചു. ഇതോടെ സംശയം ബലപ്പെടുകയും നാട്ടുകാരില്‍ ചിലര്‍ പിന്തുടര്‍ന്ന് ഇയാളെ പിടികൂടുകയുമായിരുന്നു.
കസ്റ്റഡിയിലായ ഇയാള്‍ കുറ്റം സമ്മതിച്ചു. സമീപത്തെ പുരയിടത്തില്‍ ഒളിപ്പിച്ചുവച്ചിരുന്ന ബാഗ് കാണിച്ചുകൊടുക്കുകയും ചെയ്തു.