ഹേ​ഗ്: നരേന്ദ്ര മോദിയും ഡച്ച് പ്രധാനമന്ത്രി റോബ് ജെറ്റനും നെതര്‍ലന്‍ഡ്‌സിലെ പ്രശസ്തമായ അഫ്സ്ലൂയിറ്റ്ഡിജ്ക് അണക്കെട്ട് സന്ദര്‍ശിച്ചു. ജല മാനേജ്‌മെന്റ്, കാലാവസ്ഥാ വ്യതിയാന പ്രതിരോധം, അടിസ്ഥാന സൗകര്യം, വികസനം എന്നിവയില്‍ സഹകരണം ശക്തിപ്പെടുത്തുന്നതിന്റെ ഭാഗമായാണ് സന്ദര്‍ശനം.

ജല മാനേജ്‌മെന്റില്‍ നെതര്‍ലന്‍ഡ് ലോകത്തിന് മാതൃകയായ പ്രവര്‍ത്തനങ്ങളാണ് നടത്തിയതെന്ന് നരേന്ദ്ര മോദി സോഷ്യല്‍ മീഡിയയില്‍ പങ്കുവെച്ചു. ജലസേചനം, വെള്ളപ്പൊക്ക നിയന്ത്രണം, ഉള്‍നാടന്‍ ജലപാത വികസനം എന്നിവയ്ക്കായി ആധുനിക സാങ്കേതികവിദ്യ ഇന്ത്യയിലേക്ക് കൊണ്ടുവരാന്‍ പ്രതിജ്ഞാബദ്ധമാണെന്നും അദ്ദേഹം വ്യക്തമാക്കി.

അഫ്സ്ലൂയിറ്റ്ഡിജ്ക് അണക്കെട്ടിനെ ''മികവിന്റെയും നവീകരണത്തിന്റെയും പ്രതീകം'' എന്ന് വിശേഷിപ്പിച്ച വിദേശകാര്യ മന്ത്രാലയം, ജല മാനേജ്‌മെന്റ്, വെള്ളപ്പൊക്ക പ്രതിരോധം, ശുദ്ധജല സംഭരണം എന്നിവയില്‍ അണക്കെട്ടിന്റെ നിര്‍ണായക പങ്ക് എടുത്തുകാട്ടി.

ഗുജറാത്തിലെ ഖംഭത് ഉള്‍ക്കടലിന് സമീപം ശുദ്ധജല സംഭരണിയും അണക്കെട്ടും നിര്‍മിക്കാന്‍ ലക്ഷ്യമിടുന്ന കല്‍പസര്‍ പദ്ധതിക്ക് ഡച്ച് സാങ്കേതിക വൈദഗ്ധ്യം ഏറെ പ്രയോജനപ്പെടുമെന്ന് മന്ത്രാലയം ചൂണ്ടിക്കാട്ടി.

കാലാവസ്ഥാ പ്രതിരോധം, ജല സാങ്കേതികവിദ്യ, സുസ്ഥിര അടിസ്ഥാന സൗകര്യങ്ങള്‍ എന്നിവയില്‍ ഇന്ത്യ-നെതര്‍ലന്‍ഡ്‌സ് സഹകരണം കൂടുതല്‍ ആഴത്തിലാക്കാനുള്ള സാധ്യതകള്‍ ഈ സന്ദര്‍ശനം തുറന്നുകാട്ടിയതായും മന്ത്രാലയം അറിയിച്ചു.

സ്വീഡന്‍, നോര്‍വേ, ഇറ്റലി, നെതര്‍ലന്‍ഡ്‌സ് എന്നിവ ഉള്‍പ്പെടുന്ന നാല് രാഷ്ട്രങ്ങളിലേക്കുള്ള യൂറോപ്യന്‍ പര്യടനത്തിന്റെ ഭാഗമായാണ് പ്രധാനമന്ത്രി മോദി ഹേഗ് സന്ദര്‍ശിച്ചത്.