തൊടുപുഴ: വാഗമണ്ണിലും തേക്കടിയിലും വിനോദ സഞ്ചാരികളുടെ വന്‍തിരക്ക്. കഴിഞ്ഞ വര്‍ഷത്തെ അപേക്ഷിച്ച് ഈ ഓണ സീസണില്‍ സഞ്ചാരികളുടെ എണ്ണത്തില്‍ വലിയ വര്‍ധനയാണുണ്ടായിരിക്കുന്നത്. മുന്‍വര്‍ഷത്തെ അപേക്ഷിച്ച വാഗമണ്ണില്‍ സഞ്ചാരികള്‍ക്കായി കൂടുതല്‍ സൗകര്യങ്ങളും ഒരുക്കിയിട്ടുണ്ട്. ഡിടിപിസിയും സ്വകാര്യ സംരംഭകരുമാണ് വാഗമണ്ണില്‍ വിനോദോപാധികള്‍ ഒരുക്കിയിരിക്കുന്നത്. മലനിരകളെ തഴുകുന്ന കോടമഞ്ഞും ആത്മഹത്യാ മുനമ്പില്‍ നിന്നുള്ള ദൃശ്യവും കണ്ണുകളെ വിസ്മയിപ്പിക്കും. വാഗമണ്‍ എംഎംജെ ഗ്രൂപ്പിന്റെ തടാകത്തിലെ പെഡല്‍ ബോട്ട് സവാരിയും ടീ ഗാര്‍ഡന്‍ സന്ദര്‍ശനവും സഞ്ചാരികളുടെ മനംകവരുന്നതാണ്. പൈന്‍വാലിയിലും മൊട്ടക്കുന്നിലും മതമൈത്രിയുടെ സംഗമഭൂമിയായ കുരിശുമലയിലും തങ്ങള്‍പാറയിലും മുരുകന്‍മലയിലും സഞ്ചാരികളുടെ എണ്ണം നാള്‍ക്കുനാള്‍ വര്‍ധിച്ചുവരികയാണ്.
തേക്കടി, കുമളി പ്രദേശങ്ങളിലെ മുഴുവന്‍ ലോഡ്ജുകളിലും ഹോട്ടലുകളിലും ഹോംസ്റ്റേകളിലും സഞ്ചാരികള്‍ നിറഞ്ഞുകവിഞ്ഞു. ബോട്ട ് സവാരി തന്നെയാണ് ഇവിടെ എത്തുന്നവരുടെ മുഖ്യ ആകര്‍ഷണം. തിരക്ക് വര്‍ധിച്ചതിനാല്‍ പലര്‍ക്കും ബോട്ട ് സവാരി തരപ്പെടുത്താന്‍ കഴിയാതെ നിരാശരായി മടങ്ങേണ്ടി വരുന്നുണ്ട്. കാട്ടുമൃഗങ്ങലെ അടുത്തുകാണാം എന്നതാണ് തടാകത്തിലെ ബോട്ടിംഗിന്റെ മുഖ്യ ആകര്‍ഷണം.
ഓണ അവധിക്കൊപ്പം ബലി പെരുന്നാള്‍ അവധി കൂടി ഒരുമിച്ചത്തെിയത് സംസ്ഥാനത്തുനിന്നുള്ള വിനോദ സഞ്ചാരികള്‍ക്ക് നേട്ടമായി. കര്‍ണാടകയിലെ സംഭവവികാസങ്ങളും ഇവിടെ സഞ്ചാരികളുടെ തിരക്കേറാന്‍ ഇടയാക്കി. മലബാറില്‍ നിന്നുള്ള സഞ്ചാരികളുടെ എണ്ണം ഇക്കുറി കൂടുതലാണ്.