മക്ക: ഒരു ദശകത്തിനിടെ ഏറ്റവു കുറവ് ഹാജിമാര്‍ എത്തിയത് ഈ വര്‍ഷമായിരുന്നുവെന്ന് കണക്ക്. സഊദി ജനറല്‍ അതോറിറ്റി ഫോര്‍ സ്റ്റാറ്റിറ്റിക്‌സ് വെളിപ്പെടുത്തിയ കണക്കുകളിലാണ് ഏറ്റവും കുറവ് തീര്‍ഥാടകര്‍ ഈ വര്‍ഷമാണെന്നു വ്യക്തമാക്കുന്നത്. മുന്‍ വര്‍ഷമെത്തിയ വിദേശികള്‍ക്ക് ഏകദേശം തുല്യമായ എണ്ണമാണ് ഇത്തവണയും എത്തിയത്. 18,62,900 തീര്‍ഥാടകരാണ് ഈ വര്‍ഷമെത്തിയത്. ഇതില്‍ 13,25,372 പേര്‍ വിദേശ രാജ്യങ്ങളില്‍ നിന്നുള്ളവരും 53,75,37 പേര്‍ ആഭ്യന്തര ഹാജിമാരുമാണ്.
പത്തു വര്‍ഷത്തിനിടെ കൂടുതല്‍ പേര് ഹജ്ജിനെത്തിയത് 2012 ലാണ്. 31,61,573 തീര്‍ഥാടകരാണ് ആ വര്‍ഷമെത്തിയത്.
ചരിത്രത്തില്‍ കൂടുതല്‍ തീര്‍ഥാടകരെ സ്വീകരിച്ചതും ഇതേ വര്‍ഷം തന്നെ. ഇതില്‍ 17,52,932 പേരും വിദേശികളാണ്. എന്നാല്‍ ഏറ്റവും കൂടുതല്‍ വിദേശികളെത്തിയത് ഇതിനു തൊട്ടു മുന്‍പുള്ള വര്‍ഷമാണ്. 2011ല്‍ വിദേശ രാഷ്ട്രങ്ങളില്‍ നിന്നും 18,28,195 പേരാണെത്തിയത്. മക്കയിലെ വികസന പ്രവര്‍ത്തനങ്ങളുടെ പശ്ചാത്തലത്തില്‍ തീര്‍ഥാടകരുടെ എണ്ണത്തില്‍ കുറവ് വരുത്തിയത് 2013 മുതലാണ്. 20ശതമാനം തീര്‍ഥാടകരെയാണ് ആ വര്‍ഷം മുതല്‍ വെട്ടിക്കുറച്ചത്.
ഈ വര്‍ഷം രാജ്യത്തിനകത്തുനിന്നും ഹജ്ജിനെത്തിയ വിദേശികളില്‍ മുന്നില്‍ ഈജിപ്തും രണ്ടാം സ്ഥാനം പാക്കിസ്ഥാനുമാണ്. 8446 ഹാജിമാരുമായി ഇന്ത്യയാണ് മൂന്നാമത്. ഈ വര്‍ഷം 10,82,228 പേര്‍ പുരുഷന്മാരും 780681 പേര്‍ വനിതകളുമാണ്.