പനാജി: ഗോവയില്‍ 19കാരനായ വിദ്യാര്‍ഥി അതേ വയസുകാരിയായ വിദ്യാര്‍ഥിനിയെ വെടിവച്ചുകൊന്നു.
തുടര്‍ന്ന് ഇയാള്‍ സ്വയം വെടിവച്ച് ആത്മഹത്യക്ക് ശ്രമിച്ചു. മാര്‍ഗോവയിലെ കോളജ് വിദ്യാര്‍ഥി നിഖില്‍ കുമാറാണ് ബിരുദ വിദ്യാര്‍ഥിനിയായ സുജാത നായിക്കിനെ വെടിവച്ചുകൊന്നത്. രണ്ടു തവണ ഇയാള്‍ സുജാതയ്ക്ക് നേരെ നിറയൊഴിച്ചു.
നെഞ്ചില്‍ വെടിയേറ്റ പെണ്‍കുട്ടി സംഭവസ്ഥലത്തു വച്ചു തന്നെ മരിച്ചു. ഒരു സ്വകാര്യ കമ്പനിയില്‍ സെക്യൂരിറ്റി ജീവനക്കാരനാണ് നിഖിലിന്റെ പിതാവ്. ഇയാളുടെ തോക്കുമായി സുജാതയുടെ വീട്ടിലെത്തിയ പ്രതി പെണ്‍കുട്ടിയുടെ അമ്മയും മറ്റു ബന്ധുക്കളും നോക്കിനില്‍ക്കേയാണ് വെടിയുതിര്‍ത്തത്.
ശേഷം ഇയാള്‍ വയറ്റിലേക്ക് സ്വയം വെടിവയ്ക്കുകയായിരുന്നു.
ഇയാളെ ഗോവ മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്. പ്രേമനിരാശയാണ് കൊലയ്ക്കു കാരണമെന്നാണ് പ്രാഥമിക നിഗമനം.