റോട്ടര്‍ഡാം: മാഞ്ചസ്റ്റര്‍ സിറ്റിക്കെതിരായ നാട്ടങ്ക പോരാട്ടത്തിലെ തോല്‍വിക്കു പിന്നാലെ മാഞ്ചസ്റ്റര്‍ യുനൈറ്റഡിനു യൂറോപ ലീഗ് ഫുട്‌ബോളിലെ ആദ്യ മത്സരത്തിലും പരാജയം. മറുപടിയില്ലാത്ത ഒറ്റ ഗോളിനു ഹോളണ്ട് ടീം ഫയനൂര്‍ദാണ് റെഡ് ഡെവിള്‍സിനെ വീഴ്ത്തിയത്.
ഹോസെ മൗറീഞ്ഞോ പരിശീലക സ്ഥാനമേറ്റ ശേഷമുള്ള ആദ്യ യൂറോപ പോരാട്ടത്തില്‍ തന്നെ തോല്‍വി വഴങ്ങാനായിരുന്നു ഇംഗ്ലീഷ് കരുത്തരുടെ യോഗം. മത്സരത്തിന്റെ ഏറിയ സമയത്തും ഗോള്‍ അകന്നു നിന്നപ്പോള്‍ 79ാം മിനുട്ടില്‍ ടോണി വില്‍ഹെന്നയുടെ ഗോളാണ് മാഞ്ചസ്റ്ററിന്റെ വിധി നിര്‍ണയിച്ചത്.
മുന്നേറ്റത്തില്‍ റാഷ്‌ഫോര്‍ഡിനെ ഏക സ്‌ട്രൈക്കറാക്കിയും മധ്യനിരയുടെ ചുക്കാന്‍ പോള്‍ പോഗ്ബയെ ഏല്‍പ്പിച്ചും മാഞ്ചസ്റ്ററിനെ കളത്തിലിറക്കിയ മൗറീഞ്ഞോയുടെ തന്ത്രം ഒരു ഘട്ടത്തിലും വിജയം കണ്ടില്ല. പോഗ്ബയ്‌ക്കൊപ്പം മാറ്റയും മാര്‍ഷ്യലും മധ്യനിരയിലും ഷ്‌നൈഡര്‍ലിന്‍, ആന്റണ്‍ ഹെരേര എന്നിവര്‍ ഡിഫന്‍സീവ് മിഡ്ഫീല്‍ഡിലും അണിനിരന്നു. മുന്‍ ഹോളണ്ട് താരം ഡിര്‍ക് ക്യുയിറ്റിന്റെ നേതൃത്വത്തില്‍ ഫയനൂര്‍ദ് മികച്ച പ്രകടനമാണ് പുറത്തെടുത്തത്. മറ്റൊരു മത്സരത്തില്‍ ഇറ്റാലിയന്‍ കരുത്തരായ ഇന്റര്‍ മിലാനെ ഇസ്‌റാഈല്‍ ക്ലബ് ഹപോല്‍ ബീര്‍ ഷെവ മറുപടിയില്ലാത്ത രണ്ടു ഗോളുകള്‍ക്ക് അട്ടിമറിച്ചതും ശ്രദ്ധേയമായി.
മറ്റു മത്സരങ്ങളില്‍ സതാംപ്ടണ്‍, വിയ്യാറല്‍, ഷാല്‍കെ, ആയാക്‌സ് ആംസ്റ്റര്‍ഡാം, സെനിത് ടീമുകള്‍ വിജയം കണ്ടപ്പോള്‍ സെല്‍റ്റ വിഗോ, ഫിയോറെന്റീന, എ.എസ് റോമ ടീമുകള്‍ സമനില വഴങ്ങി.
ഷാല്‍കെ 1-0ത്തിനു നീസിനേയും വിയ്യാറല്‍ 2-1നു സുറിച്ചിനേയും അയാക്‌സ് 2-1നു പനതിനായികോസിനേയും സതാംപ്ടന്‍ 3-0ത്തിനു സ്പാര്‍ട പ്രഹയേയും പരാജയപ്പെടുത്തി. ഇറ്റാലിയന്‍ കരുത്തരായ റോമയെ വിക്ടോറിയ പ്ലാസന്‍ 1-1നു സമനിയില്‍ കുരുക്കുകയായിരുന്നു.