ന്യൂഡല്‍ഹി: ചിക്കുന്‍ഗുനിയയും ഡെങ്കിപ്പനിയും ഡല്‍ഹിയെ വിറപ്പിക്കുമ്പോള്‍ വിദേശ സന്ദര്‍ശനം നിര്‍ത്തി ഉടന്‍ തിരികെ വരാന്‍ മന്ത്രിയോട് ലഫ്റ്റനന്റ് ഗവര്‍ണര്‍. ഫിന്‍ലാന്‍ഡ് സന്ദര്‍ശനം റദ്ദാക്കി നാട്ടിലെത്താന്‍ ഉപമുഖ്യമന്ത്രി മനീഷ് സിസോദിയയോടാണ് ഗവര്‍ണര്‍ നജീബ് ജംങ് ആവശ്യപ്പെട്ടത്. വിദ്യാഭ്യാസ വകുപ്പ് മന്ത്രി കൂടിയായ സിസോദിയ ഫിന്‍ലാന്‍ഡിലെ വിദ്യാഭ്യാസ സമ്പ്രദായം പഠിക്കാനാണ് പോയത്.  മുപ്പതോളം പേരാണ്  ഡല്‍ഹിയില്‍ ചിക്കുന്‍ഗുനിയയും ഡെങ്കിപ്പനിയും ബാധിച്ച്  മരിച്ചത്. രോഗബാധിതരുടെ എണ്ണം മുവായിരത്തിനടുത്തായിട്ടുണ്ട്. പകര്‍ച്ചവ്യാധി രോഗം വ്യാപിച്ച ഡല്‍ഹിയില്‍ മുഖ്യമന്ത്രി അരവിന്ദ് കെജ്‌രിവാള്‍, സിസോദിയ, മറ്റു മന്ത്രിമാര്‍ എന്നിവരുടെ അഭാവത്തില്‍ കോണ്‍ഗ്രസ് പ്രതിഷേധം നടത്തുന്നുണ്ട്.