വാഷിങ്ടണ്‍: ഇറാനെ ലക്ഷ്യം വച്ച് 200ലധികം ആണവായുധ ശേഖരങ്ങള്‍ ഇസ്‌റാഈല്‍ സജ്ജീകരിച്ചിട്ടുണ്ടെന്ന് യു.എസ് മുന്‍ വിദേശകാര്യ സെക്രട്ടറി കോളിന്‍ പവല്‍.  പവലിന്റെ സ്വകാര്യ ഇ- മെയില്‍ ചോര്‍ത്തിയ ഹാക്കര്‍മാരാണ് ഈ വിവരം പുറത്തുവിട്ടത്. ഒരു സുഹൃത്തിനയച്ച ഇ- മെയിലിലാണ് പവല്‍ ഇക്കാര്യം പറയുന്നത്. ഇസ്‌റാഈലിന് ആണവായുധങ്ങളെകുറിച്ച് വ്യക്തമായ സൂചനകളുണ്ടെങ്കിലും സ്വയം ഒരു ആണവരാജ്യമായി ഇസ്‌റാഈല്‍ പ്രഖ്യാപനം നടത്തിയിട്ടില്ല.
അതേസമയം 200 ആയുധ ശേഖരങ്ങളെ കുറിച്ചുമാത്രമാണ് ഇറാന് അറിവുള്ളതെന്നും യഥാര്‍ഥത്തില്‍ അത് ആയിരത്തിലധികമുണ്ടെന്നും വാഷിങ്ടണിലെ ഇസ്‌റാഈല്‍ എംബസി വക്താവ് ഇതായ് ബാര്‍ഡോവ് പറഞ്ഞു. എന്നാല്‍ കോളിന്‍ പവലിന്റെ ഇ മെയില്‍ സംബന്ധിച്ച് പ്രതികരിക്കാന്‍ അദ്ദേഹം തയാറായില്ല. യു.എസ് വിദേശകാര്യ വകുപ്പും ഇതു സംബന്ധിച്ച് പ്രതികരിച്ചിട്ടില്ല. നേരത്തെ മുന്‍ യു.എസ് പ്രസിഡന്റ് ജിമ്മി കാര്‍ട്ടറും പവലിനേതിനു സമാനമായ വെളിപ്പെടുത്തലുകള്‍ നടത്തിയിരുന്നു. 150 മുതല്‍ 300 ആണവായുധങ്ങള്‍ വരെ ഇസ്‌റാഈലിനുണ്ടെന്നായിരുന്നു അദ്ദേഹത്തിന്റെ പ്രസ്താവന.
അമേരിക്ക ഓണ്‍ലൈന്റെ സ്വകാര്യ ഇ- മെയില്‍ അക്കൗണ്ട് ഉപയോഗിച്ചാണ് ഉന്നത ഉദ്യോഗസ്ഥരുമായി പവല്‍ ആശയവിനിമയം നടത്തിയിരിക്കുന്നത്. സമാനമായി വിദേശകാര്യ സെക്രട്ടറിയായിരിക്കെ സ്വകാര്യ ഇ മെയില്‍ ഔദ്യോഗിക ആവശ്യങ്ങള്‍ക്ക് ഉപയോഗിച്ച ഡെമോക്രാറ്റിക് പ്രസിഡന്റ് സ്ഥാനാര്‍ത്ഥി ഹിലരി ക്ലിന്റന്‍ വന്‍ വിവാദത്തില്‍ പെട്ടിരുന്നു. ഹിലരിയുടെയും ഡെമോക്രാറ്റിക് പാര്‍ട്ടി നാഷനല്‍ കമ്മിറ്റിയുടേയും ഇ- മെയിലുകള്‍ റഷ്യന്‍ ഹാര്‍ക്കര്‍മാര്‍ ചോര്‍ത്തിയ സംഭവത്തില്‍ അന്വേഷണം തുടരുന്നതിനിടെയാണ് പവലിന്റെ മെയിലുകള്‍ ചോര്‍ന്നിരിക്കുന്നത്.