ന്യൂഡല്‍ഹി: ടെസ്റ്റ്-ഏകദിന പരമ്പരകള്‍ക്കായി ഇന്ത്യയിലെത്തിയ ന്യൂസിലന്‍ഡ് മുംബൈക്കെതിരായ ത്രിദിന സന്നാഹ മത്സരത്തില്‍ ലീഡ് വഴങ്ങി. ആദ്യ ഇന്നിങ്‌സില്‍ ഏഴു വിക്കറ്റ് നഷ്ടത്തില്‍ 324 റണ്‍സെടുത്ത് ഡിക്ലയര്‍ ചെയ്ത കിവീസിനെതിരേ മുംബൈ രണ്ടാം ദിനം കളിയവസാനിപ്പിക്കുമ്പോള്‍ അഞ്ചു വിക്കറ്റ് നഷ്ടത്തില്‍ 431 റണ്‍സെടുത്തിട്ടുണ്ട്. ഒരു ദിവസവും അഞ്ചു വിക്കറ്റും ശേഷിക്കെ ടീമിനിപ്പോള്‍ 107 റണ്‍സിന്റെ ലീഡുണ്ട്.
കൗസ്തുഭ് യാദവ്(100) സൂര്യകുമാര്‍ യാദവ്(103) എന്നിവര്‍ മുംബൈക്കായി സെഞ്ച്വറി നേടി. 86 പന്തില്‍ ഏട്ടു സിക്‌സറും ഒന്‍പതു ബൗണ്ടറിയടക്കമാണ് സൂര്യകുമാര്‍ യാദവ് സെഞ്ച്വറി നേടിയത്. അര്‍മാന്‍ ജാഫര്‍(69) ആദിത്യ താരെ(53*) സിദ്ദേഷ് ലാഡ്(86*) എന്നിവരും മികച്ച രീതിയില്‍ ബാറ്റ്  ചെയ്തു.