കൊയിലാണ്ടി: ആകാശത്തു പകല്‍ സമയം സൂര്യനു ചുറ്റും വെള്ളി വലയം പ്രത്യക്ഷപ്പെട്ടതു നാട്ടുകാരില്‍ കൗതുകമുണര്‍ത്തി. ഇന്നലെ പകല്‍ 12 മുതല്‍ പ്രത്യക്ഷപ്പെട്ട പ്രതിഭാസം ഏകദേശം 45 മിനിറ്റ് നേരം നീണ്ടുനിന്നു.
സൂര്യനുചുറ്റും നിശ്ചിത വ്യാപ്തിയില്‍ വിളറിയ കറുപ്പുനിറം വ്യാപിക്കുകയും ഇതിനു ചുറ്റും വെള്ളിവലയം ആവരണം ചെയ്യുന്നതുമാണ് ഈ വിസ്മയക്കാഴ്ച. 'സോളാര്‍ ഹാലൊ' എന്നാണു ശാസ്ത്രലോകം ഇതിനെ വിളിക്കുന്നത്. പകല്‍ സമയം സൂര്യനു ചുറ്റും രാത്രിയില്‍ ചന്ദ്രനു ചുറ്റുമായി വല്ലപ്പോഴും പ്രത്യക്ഷപ്പെടുന്ന പ്രതിഭാസമാണിതെന്ന് കോഴിക്കോട് മേഖലാ ശാസ്ത്ര കേന്ദ്രം ഡയരക്ടര്‍ ഡോ. രാമചന്ദ്രന്‍ പറഞ്ഞു. പകല്‍ സമയം സൂര്യന്റെ കിരണങ്ങളില്‍ പ്രത്യേകതരം മേഘപാളികള്‍ തട്ടുമ്പോഴാണ് ഇത്തരം ആകാശക്കാഴ്ചകള്‍ പ്രത്യക്ഷപ്പെടുന്നതെന്നും അദ്ദേഹം വ്യക്തമാക്കി.