തൊടുപുഴ: ലോകബാങ്കിന്റെ സഹായത്തോടെ കേരളത്തിലെ തെരഞ്ഞെടുത്ത പഞ്ചായത്തുകളില്‍ നടപ്പാക്കിവരുന്ന ശുദ്ധജല വിതരണ പദ്ധതിയായ ജലനിധിയുടെ ജലതരംഗം മാധ്യമ പരിശീലനം 19, 20 തീയതികളില്‍ തൊടുപുഴയില്‍ നടത്തുമെന്ന് റീജിയണല്‍ പ്രോജക്ട് ഡയറക്ടര്‍ കെ ജി റെജി വാര്‍ത്താ സമ്മേളനത്തില്‍ പറഞ്ഞു.
ജലനിധി ഡയറക്ടര്‍ പ്രേംലാല്‍ പരിശീനല പരിപാടി ഉദ്ഘാടാനം ചെയ്യും.
ആദ്യഘട്ടമായി മീനച്ചില്‍ താലൂക്കിലെ ജലനിധി പഞ്ചായത്തുകളിലെ ശുദ്ധജലവിതരണ സമിതി അംഗങ്ങളില്‍നിന്ന് തെരഞ്ഞടുക്കപ്പെടുന്നവര്‍ക്കാണ് പരിശീലനം.
മാധ്യമ പരിശീലനത്തിന് താല്‍പര്യമുള്ളവരെ ലേഖന രചനയിലൂടെയും അഭിമുഖത്തിലൂടെയുമാണ് തെരഞ്ഞെടുക്കുന്നത്.
തലപ്പലം, ഭരണങ്ങാനം, മീനച്ചില്‍, കരൂര്‍, കൊഴുവനാല്‍, മരങ്ങാട്ടുപള്ളി, തീക്കോയി, മുത്തോലി, കടപ്ലാമറ്റം, പൂഞ്ഞാര്‍ തെക്കേക്കര, തിടനാട് എന്നീ പഞ്ചായത്തുകളില്‍നിന്നുള്ള മുപ്പത് പേര്‍ക്കാണ് ജലനിധിയുടെ ഇടുക്കി മേഖല ഓഫീസില്‍നിന്ന് ആദ്യഘട്ട പരിശീലനം നല്‍കുന്നത്.
പത്രം, റേഡിയോ, സാമൂഹ്യ മാധ്യമം, ടെലിവിഷന്‍ തുടങ്ങിയ മേഖലകളിലെ പ്രവര്‍ത്തനങ്ങളെക്കുറിച്ച് മാധ്യമരംഗത്തെ പ്രമുഖര്‍ ക്ലാസ് എടുക്കും.
ഇത്തരത്തില്‍ പരിശീലനം നേടിയവരിലൂടെയാണ് ജലനിധി ഗുണഭോക്തൃസമിതി അംഗങ്ങളുടെ അനുഭവങ്ങള്‍, ജലം-പരിസരശുചിത്വം-പരിസ്ഥിതി കാഴ്ചപ്പാടുകള്‍, അവലോകനങ്ങള്‍ എന്നിവ പൊതുജനങ്ങളിലേക്ക് എത്തിക്കുന്നത്.
ജലനിധിയുടെ തുടര്‍നടത്തിപ്പിനും സുസ്ഥിരതയ്ക്കും ഇവരെ ഉപയോഗിക്കും. സൗജന്യമായി നടത്തുന്ന പരിശീലനത്തില്‍ പങ്കെടുക്കുന്നവര്‍ക്ക് സര്‍ട്ടിഫിക്കറ്റുകള്‍ വിതരണം ചെയ്യും.
വാര്‍ത്താസമ്മേളനത്തില്‍ മാനേജര്‍ കമ്യൂണിറ്റി ഡവലപ്‌മെന്റ് ജോസ് ജയിംസ്, കണ്‍സള്‍ട്ടന്റ് ജിജോ ജോസ് എന്നിവരും പങ്കെടുത്തു.