റിയാദ് : സഊദിയില്‍ സുരക്ഷാ സേനയ്ക്ക് നേരെ നടന്ന ഭീകരാക്രമണത്തില്‍ രണ്ടു സുരക്ഷാ പൊലിസുകാര്‍ കൊല്ലപ്പെട്ടതായി ആഭ്യന്തര മന്ത്രാലയം വ്യക്തമാക്കി. കിഴക്കന്‍ പ്രദേശത്തെ പ്രമുഖ പട്ടണമായ ദമ്മാമിന് സമീപമാണ് ശനിയാഴ്ച്ച രാത്രി ആക്രമണം നടന്നത്. പൊലിസ് പട്രോളിങിനിടെ സുരക്ഷാ വാഹനത്തിനു നേരെ ഒരു സംഘം നിറയൊഴിക്കുകയായിരുന്നു. ആക്രമണത്തില്‍ പൊലിസ് തലവന്‍ മൂസാ അലി മുഹമ്മദ് അല്‍ഖിബി , കീഴുദ്യോഗസ്ഥന്‍ നവാഫ് മഹ്മാസ് അല്‍ ഉതൈബി എന്നിവരാണ് കൊല്ലപ്പെട്ടത്. സംഭവത്തില്‍ ആഭ്യന്തര മന്ത്രാലയം അന്വേഷണത്തിന് ഉത്തരവിട്ടിട്ടുണ്ട്. നേരത്തെയും ഈ പ്രദേശത്തു സുരക്ഷാ സേനക്ക് നേരെ നിരവധി ആക്രമണങ്ങള്‍ നടന്നിരുന്നു.