ചെന്നൈ: ഇന്‍ഫോസിസ് ജീവനക്കാരിയായിരുന്ന സ്വാതിയെ കൊലപ്പെടുത്തിയ കേസിലെ പ്രതി രാംകുമാറിനെ ചെന്നൈയിലെ ജയിലില്‍ ജീവനൊടുക്കിയ നിലയില്‍ കണ്ടെത്തി. വൈദ്യുതി കമ്പിയില്‍ കടിച്ചാണ് രാംകുമാര്‍ ജീവനൊടുക്കിയതെന്നാണ് റിപ്പോര്‍ട്ട്. ഇയാളെ ഉടന്‍ റോയപ്പേട്ടയിലെ സര്‍ക്കാര്‍ ആശുപത്രിയില്‍ എത്തിച്ചെങ്കിലും മരിച്ചു.
കഴിഞ്ഞ ജൂണ്‍ 24നാണ് സ്വാതി കൊല്ലപ്പെടുന്നത്. നുങ്കംപാക്കം റെയില്‍വേ സ്റ്റേഷനില്‍ വച്ചാണ് കൊല നടന്നത്.
പ്ലാറ്റ്‌ഫോമില്‍ ട്രെയിന്‍ കാത്തിരിക്കുന്നതിനിടെ സ്വാതിയുടെ അടുത്തെത്തിയ രാംകുമാര്‍  ബാഗില്‍ ഒളിപ്പിച്ച കത്തിയെടുത്ത് വെട്ടിവീഴ്ത്തുകയായിരുന്നു.
മുഖത്തും കഴുത്തിലും മാരകമായി വെട്ടേറ്റ സ്വാതി സംഭവസ്ഥലത്തുവച്ചുതന്നെ മരിച്ചു. അറസ്റ്റ് ചെയ്ത ദിവസം കഴുത്തുമുറിച്ച് ജീവനൊടുക്കാന്‍ ഇയാള്‍ ശ്രമിച്ചിരുന്നു. പ്രണയാഭ്യര്‍ഥന നിരസിച്ചതിനെ തുടര്‍ന്നാണ് കൊലപാതകമെന്നായിരുന്നു രാംകുമാര്‍ പൊലിസിനോട് പറഞ്ഞത്.