കൊട്ടിയം: തൃക്കോവില്‍വട്ടംപഞ്ചായത്തിലെ മൈലാപ്പൂര് എ .കെ. എം ഹയര്‍സെക്കന്‍ഡറി സ്‌കൂള്‍ പരിസരത്ത് മാലിന്യം നിക്ഷേപം തകൃതി.
ഇവിടെയിപ്പോള്‍ മാലിന്യം കുന്നുകൂടി കിടക്കുകയാണ്. രൂക്ഷമായ ദുര്‍ഗന്ധം സ്‌കൂള്‍ കുട്ടികളെ ദുരിതത്തിലാക്കിയിട്ടുണ്ട്. സ്‌കൂളിലേക്കുള്ള കോട്ടമുറി റോഡിലെ കലുങ്കിന്റെ ഭാഗത്ത് ഇരുവശങ്ങളിലായി കാടിന്റെ മറവിലാണ് മാലിന്യം തള്ളുന്നത്.
കോട്ടമുറിയില്‍ നിന്ന് പ്രദേശത്തെ സ്വകാര്യ മെഡിക്കല്‍ കോളജിലേക്കുള്ള റോഡ് മൃഗാവശിഷ്ടങ്ങളും മാലിന്യങ്ങളും കൊണ്ട് നിറഞ്ഞു.
വഴിയാത്രക്കാര്‍ മൂക്കു പൊത്താതെ നടക്കാനാകില്ല. പ്രദേശത്തെ കിണറുകളില്‍ മലിനജലം ഒഴുകിയിറങ്ങി ആരോഗ്യപ്രശ്‌നങ്ങളുമുണ്ടാക്കുന്നുണ്ട്. വ്യാപക പരാതിയുയര്‍ന്നിട്ടും ആരോഗ്യവകുപ്പ് നടപടിയെടുത്തിട്ടില്ല.