തൊഴിലാളികള്‍ ഇന്ന് നഗരസഭ സോണല്‍ ഓഫിസിലേക്ക് മാര്‍ച്ച് നടത്തും
മട്ടാഞ്ചേരി: വേണ്ടത്ര ശുചിത്വമില്ലായെന്ന കാരണത്താല്‍ മലിനീകരണ നിയന്ത്രണ ബോര്‍ഡ് എട്ട് വര്‍ഷം മുമ്പ് അടച്ച് പൂട്ടിയ മട്ടാഞ്ചേരി മരക്കടവ് അറവുശാലയുടെ നവീകരണം അനന്തമായി നീളുന്നത് മേഖലയിലെ തൊഴിലാളികളെ ആശങ്കയിലാക്കുന്നു. അറവുശാല നവീകരണത്തിന് നഗരസഭ നിരവധി പദ്ധതികള്‍ പ്രഖ്യാപിക്കുകയും ബജറ്റില്‍ തുക വകയിരുത്തുകയും ചെയ്‌തെങ്കിലും തുടര്‍ നടപടികളൊന്നും ഇല്ലാതെ പോകുകയായിരുന്നു.
അവസാനം ആധുനിക അറവുശാലക്കായി രണ്ട് കോടി നാല്‍പത് ലക്ഷം ബജറ്റില്‍ നീക്കിവയ്ക്കുകയും പുതിയ മേയര്‍ അറവ് ശാല സന്ദര്‍ശിച്ച് നവീകരണം അടിയന്തിരമായി നടപ്പാക്കുമെന്ന് പ്രഖ്യാപിച്ചെങ്കിലും ഒന്നും സംഭവിച്ചില്ല. ശുചിത്വത്തിന്റെ പേരില്‍ അറവുശാല അടച്ചുപൂട്ടിയെങ്കിലും അതിനേക്കാല്‍ മോശം സാഹചര്യത്തിലാണ് ഇപ്പോള്‍ അറവ് നടക്കുന്നത്.
ജീവിതം വഴി മുട്ടിയ ഇറച്ചി കച്ചവടക്കാരും തൊഴിലാളികളും ഇപ്പോള്‍ യാതൊരു മറയുമില്ലാതെ പൊതു സ്ഥലങ്ങളിലും മാര്‍ക്കറ്റിലും ആട് മാടുകളെ കശാപ്പ് ചെയ്യുന്ന അവസ്ഥയാണ്. യാതൊരു പരിശോധനയുമില്ലാതെയാണ് കശാപ്പ് നടക്കുന്നതെന്നത് കൂടുതല്‍ ആശങ്കകള്‍ക്ക് കാരണമാകുന്നു. ഇത്തരം സാഹചര്യത്തില്‍ കച്ചവടം ചെയ്യുന്നതില്‍ യാതൊരു താല്‍പ്പര്യവുമില്ലന്നും ജീവിക്കാന്‍ വേറെ വഴിയില്ലാത്തതിനാലാണെന്നും തൊഴിലാളികള്‍ പറയുന്നു. ജനങ്ങളുടെ ആരോഗ്യവും ജീവനും സംരക്ഷിക്കുന്നതിന് ഭരണാധികാരികള്‍ക്ക് ഉത്തരവാദിത്വമുണ്ടെന്നും അതിന് അറവ് ശാല നവീകരിക്കുകയാണ് വേണ്ടതെന്നും കേരള മീറ്റ് വര്‍ക്കേഴ്‌സ് അസോസിയേഷന്‍ സംസ്ഥാന പ്രസിഡന്റ് എ.കെ ഫസലുദ്ദീന്‍ പറഞ്ഞു.
അറവുശാല നവീകരണത്തിനായി നിരവധി സമരങ്ങള്‍ നടത്തിയിട്ടും അധികാരികളുടെ കണ്ണ് തുറക്കാത്ത അവസ്ഥയാണെന്നും അദ്ദേഹം ആരോപിച്ചു. റിയല്‍ എസ്റ്റേറ്റ് ലോബിയുടെ സമ്മര്‍ദത്തിന് വഴങ്ങിയാണ് അറവ് ശാല നവീകരണം അധികാരികള്‍ അനന്തമായി നീട്ടി കൊണ്ട് പോകുന്നതെന്നും ആക്ഷേപം ഉയര്‍ന്നിട്ടുണ്ട്. വര്‍ഷങ്ങളായി പ്രവര്‍ത്തിക്കുന്ന അറവ് ശാല ഇല്ലാതാക്കാന്‍ ചില വന്‍കിടക്കാര്‍ ശ്രമിക്കുന്നുണ്ടെന്നും ഇവര്‍ പരാതിപ്പെടുന്നു. അതേസമയം ജനവാസ മേഖലയില്‍ നിന്ന് അറവ് ശാല മാറ്റണമെന്നാവശ്യപ്പെട്ട് ചിലര്‍ രംഗത്തുണ്ട്. അറവുശാല നവീകരിക്കുക, വെറ്ററിനറി സര്‍ജനെ നിയമിക്കുക തുടങ്ങിയ ആവശ്യങ്ങള്‍ ഉന്നയിച്ച് കേരള മീറ്റ് വര്‍ക്കേഴ്‌സ് അസോസിയേഷന്‍ കൊച്ചി മേഖല കമ്മിറ്റിയുടെ ആഭിമുഖ്യത്തില്‍ ഇന്ന് രാവിലെ പത്തരക്ക് തൊഴിലാളികള്‍ നഗരസഭ മട്ടാഞ്ചേരി സോണല്‍ ഓഫീസിലേക്ക് മാര്‍ച്ച് നടത്തും. മാര്‍ച്ച് നഗരസഭ പ്രതിപക്ഷ നേതാവ് കെ ജെ ആന്റണി ഉല്‍ഘാടനം ചെയ്യും.