പൂച്ചാക്കല്‍: മൊബൈല്‍ സമ്മാന തട്ടിപ്പില്‍ യുവാവ് കബളിക്കപ്പെട്ടു. മൊബൈല്‍ നമ്പര്‍ നറുക്കെടുപ്പിലൂടെ രണ്ട് സ്വര്‍ണ്ണ നാണയങ്ങള്‍ സമ്മാനമായി ലഭിച്ചുവെന്ന സന്ദേശമാണ് യുവാവ് തട്ടിപ്പിന് ഇരയാവാന്‍ കാരണമായത്. സ്വര്‍ണ്ണ നാണയത്തിനു പകരം ലഭിച്ചത് മൂന്ന് മുത്തുമാലകളായിരുന്നു.
  രണ്ടാഴ്ചക്ക് മുമ്പാണ് അരൂക്കുറ്റി സ്വദേശിയായ യുവാവിന്  സ്വര്‍ണ്ണ നാണയം ലഭിച്ചെന്ന് ഫോണ്‍ സന്ദേശം ലഭിക്കുന്നത്.നറുക്കെടുപ്പിലൂടെ താങ്കളുടെ ഫോണ്‍ നമ്പറിന് രണ്ട് സ്വര്‍ണ്ണ നാണയങ്ങള്‍ സമ്മാനമായി ലഭിച്ചുവെന്നായിരുന്നു അറിയിപ്പ്. തുടര്‍ന്ന് യുവാവിന്റെ  വിലാസം വാങ്ങുകയും ചെയ്തു.  പോസ്റ്റ് ഓഫീസില്‍ സമ്മാനം വരുമ്പോള്‍ 1000 രൂപ നല്‍കണമെന്നും പറഞ്ഞ് വീണ്ടും ഫോണ്‍ വന്നു. രണ്ടാഴ്ച കഴിഞ്ഞ് നദുവത്ത് നഗര്‍ പോസ്റ്റ്ഓഫീസില്‍ പാര്‍സലായി സമ്മാനം എത്തി. സര്‍വീസ് ചാര്‍ജ് ഉള്‍പ്പെടെ 1000 രൂപ നല്‍കുകയും ചെയ്തു.തുടര്‍ന്ന് പാര്‍സല്‍ തുറന്ന് നോക്കിയപ്പോഴാണ് കമ്പളിപ്പിക്കപ്പെട്ട കാര്യം മനസ്സിലാകുന്നത്.രണ്ട് സ്വര്‍ണ നാണയത്തിന് പകരം മൂന്ന് മുത്തുമാലകള്‍ ആയിരുന്നു.ബാലാജി എന്റര്‍ പ്രെയ്‌സസ്, വിശാഖപട്ടണം എന്ന വിലാസത്തില്‍ നിന്നാണ് പാര്‍സല്‍ അയച്ചത്. നേരത്തെ വിളിച്ച നമ്പറില്‍ ബന്ധപ്പെട്ടപ്പോള്‍ നമ്പര്‍ നിലവിലില്ലെന്ന സന്ദേശമാണ് ലഭിച്ചത്.