ചെന്നൈ: മദ്യലഹരിയിലായിരുന്ന വിദ്യാര്‍ഥി ഓടിച്ച കാര്‍ നിരവധി ഓട്ടോകളിലിടിച്ച് ഒരു ഓട്ടോ ഡ്രൈവര്‍ മരിച്ചു. പത്തു പേര്‍ക്ക് പരുക്കേറ്റിട്ടുണ്ട്. ഇന്ന് പുലര്‍ച്ചെ ചെന്നൈ സിറ്റി കത്തീഡ്രല്‍ റോഡിലായിരുന്നു സംഭവം. ഓട്ടോഡ്രൈവര്‍ ജി.അരുമുഖം(29)ആണ് മരിച്ചത്.സുപ്രിം കോടതിയിലെ വക്കീലായ വിജയ് ആനന്ദിന്റെ മകന്‍ വികാസ് വിജയാനന്ദ്(22) ഓടിച്ച പോര്‍ഷെ കാറാണ് നഗരത്തിലെ ഓട്ടോ സ്റ്റാന്റില്‍ നിര്‍ത്തിയിട്ട 12 ഓട്ടോകളെ ഇടിച്ചുതെറിപ്പിച്ചത്.

ഇടിയുടെ ആഘാതത്തില്‍ ഓട്ടോകളും കാറും പൂര്‍ണമായും തകര്‍ന്നിട്ടുണ്ട്. ഇന്ന് പുലര്‍ച്ചെ 3.30ഓടെയായിരുന്നു അപകടം. സംഭവ സമയം അരുമുഖം ഓട്ടോയില്‍ കിടന്നുറങ്ങുകയായിരുന്നു. നിയമ വിദ്യാര്‍ഥിയായ വികാസിനെ പൊലിസ് അറസ്റ്റു ചെയ്തു. പരുക്കേറ്റവരെ രാജീവ് ഗാന്ധി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്. കഴിഞ്ഞ ജൂണിലും ഇവിടെ സമാനമായ രീതിയില്‍ അപകടമുണ്ടായിരുന്നു.