കൊച്ചി : മുനിസിപ്പല്‍ കോര്‍പ്പറേഷന്‍ കൗണ്‍സില്‍ അംഗങ്ങള്‍ ഓണാഘോഷത്തിന്റെ ഭാഗമായി സുഭാഷ് പാര്‍ക്കില്‍ ഇന്നലെ ഒത്തുകൂടി.
മേയര്‍ സൗമിനി ജെയിന്‍, ഡെപ്യൂട്ടി മേയര്‍ ടി.ജെ വിനോദ്,  മുന്‍ മേയര്‍ ടോണി ചമ്മണി, മുന്‍ ജി.സി.ഡി.എ ചെയര്‍മാന്‍ എന്‍ വേണുഗോപാല്‍, മുന്‍ പ്രതിപക്ഷ നേതാവ് കെ.ജെ ജേക്കബ് എന്നിവരടക്കമുള്ള 2010-2015 കാലയളവിലെ കൊച്ചി മുനിസിപ്പല്‍ കോര്‍പ്പറേഷന്‍ കൗണ്‍സില്‍ അംഗങ്ങളാണ് ഓണാഘോഷത്തിന്റെ ഭാഗമായി സുഭാഷ് പാര്‍ക്കില്‍ ഒത്തുകൂടിയത്.
ഈ കാലയളവില്‍പെട്ട 60 മുന്‍ കൗണ്‍സിലര്‍മാര്‍ സ്‌നേഹസംഗമത്തിലും ഓണാഘോഷത്തോടനുബന്ധിച്ചുള്ള ഒത്തുകൂടലിലും സന്നിഹിതരായിരുന്നു.കഴിഞ്ഞ കൗണ്‍സിലിന്റെ കാലത്ത് പൂര്‍ത്തീകരിക്കപ്പെട്ട  പ്രധാനപ്പെട്ട പദ്ധതികളിലൊന്നായ സുഭാഷ് പാര്‍ക്കിന്റെ നവീകരണ പ്രവര്‍ത്തനങ്ങളുടെ ഒരുവര്‍ഷം പൂര്‍ത്തിയാവുന്ന ഈ വേളയില്‍ നടന്ന സ്‌നേഹസംഗമം ഏറെ അര്‍ത്ഥവത്തായി.
കഴിഞ്ഞ കൗണ്‍സിലിന്റെ ഭാഗമായിരുന്ന ഈ കൗണ്‍സിലിലും തുടരുന്ന കൗണ്‍സില്‍ അംഗങ്ങളും കൗണ്‍സിലിനോട് വിടപറഞ്ഞ അംഗങ്ങളും ഒത്തുചേര്‍ന്നപ്പോള്‍ പ്രധാന ചര്‍ച്ചയായത് നഗരവികസനവുമായി ബന്ധപ്പെട്ട വിഷയങ്ങള്‍തന്നെയായിരുന്നു.മുന്‍ കൗണ്‍സിലര്‍മാരുടെ വിവിധ കലാപരിപാടികളും നടന്നു. വിഭവ സമൃദ്ധമായ സദ്യയോടെയായി ഈ സ്‌നേഹസംഗമത്തിന് തിരശ്ശീല വീണത്.