കൊച്ചി: അന്യ സംസ്ഥാന തൊഴിലാളികളെ മര്‍ദ്ദിച്ച് പണവും മൊബൈല്‍ ഫോണും മറ്റും തട്ടിയെടുക്കുന്ന സംഘത്തിലെ ഒളിവില്‍ കഴിഞ്ഞിരുന്ന പ്രതിയെ പിടികൂടി. പെരുമ്പടപ്പ് സ്വദേശി പനക്കല്‍ വീട്ടില്‍ ലോറന്‍സ് ജോയി (20)  ആണു പിടിയിലായത്.
കഴിഞ്ഞ മൂന്ന് മാസമായി വിവിധ സ്ഥലങ്ങളില്‍ ഒളിവിലായിരുന്ന പ്രതി വിശദമായ അന്വേഷണത്തിനൊടുവിലാണ് പൊലിസിന്റെ വലയിലായത്.
സംഘത്തിലെ മറ്റ് പ്രതികളായ പള്ളുരുത്തി  നമ്പ്യാപുരം അടിക്കാനാട് പറമ്പില്‍ നഹാസ് (20), തോപ്പും പടി കഴുത്തുമുട്ടത്ത് പുളിന്തറ ജെന്‍സണ്‍ (20), ചേര്‍ത്തല തിരുനെല്ലൂര്‍ കൊപ്പുഴചിറയില്‍ കുമാര്‍ജി (19), ചേര്‍ത്തല തൈക്കാട്ടുശേരി വണപ്പുറം ചാണയില്‍ അഗ്‌നേശ്വര്‍ (20), ഇടക്കൊച്ചി, കുമ്പളം ഫെറി,പൊഴിപ്പറമ്പില്‍ വിനു (19) എന്നിവരെ സംഭവം നടന്നയുടന്‍ സെന്‍ട്രല്‍ പൊലിസ് അറസ്റ്റ് ചെയ്തിരുന്നു.
നഗരത്തിലെ  ഹോട്ടലുകളിലും മറ്റും ജോലികഴിഞ്ഞ് രാത്രകാലങ്ങളില്‍ താമസ സ്ഥലത്തേക്ക് പോകുന്ന അന്യസംസ്ഥാനക്കാരേയും നഗരത്തില്‍ രാത്രി എത്തുന്ന ഭിന്നലിംഗക്കാരെ തേടിവരുന്നവരേയും ബൈക്കില്‍ ചുറ്റിനടന്ന് ആക്രമിക്കുന്നതായിരുന്നു കവര്‍ച്ചാ സംഘത്തിന്റെ പതിവ്. നഗരത്തില്‍ നാളുകളായി നടക്കുന്ന പിടിച്ചുപറിയില്‍ അന്വേഷണം നടത്തുന്നതിനിടയിലാണ് പ്രതികള്‍ അറസ്റ്റിലായത്.
കമ്മിഷണര്‍ എം.പി ദിനേശിന്റെ നിര്‍ദേശപ്രകാരം ഡെപ്യൂട്ടി കമ്മീഷണര്‍ അരുള്‍ ബി നായരുടെ നേതൃത്വത്തിലുള്ള അന്വേഷണ സംഘത്തില്‍ എറണാകുളം അസിസ്റ്റന്റ് കമ്മിഷണര്‍ കെ ലാല്‍ജി, സെന്‍ട്രല്‍ സക്കിള്‍ ഇന്‍സ്‌പെക്ടര്‍മാരായ എസ് വിജയശങ്കര്‍, ഡി ദീപു, ധരണീധരന്‍, സീനിയര്‍ സി.പി.ഒ മണി, സി.പി.ഒമാരായ സുധീര്‍ബാബു, രാജേഷ്, പ്രവീണ്‍ എന്നിവരാണ് അന്വേഷണ സംഘത്തലുണ്ടായിരുന്നത്.