തുറവൂര്‍: മണ്ണ് മാഫിയയ്‌ക്കെതിരെ പ്രതികരിച്ചതിന് രണ്ടംഗ ക്വട്ടേഷന്‍ സംഘം വീട് കയറി കുടുംബാംഗങ്ങളെ ആക്രമിച്ചതായി പരാതി. പള്ളിപ്പുറം ഗ്രാമപഞ്ചായത്ത് ആറാം വാര്‍ഡില്‍ കളത്തില്‍ ഭാഗം പുളിക്കല്‍ വീട്ടില്‍ ശ്രീകുമാര്‍ (45), ഭാര്യ ജ്യോതി (39), മകന്‍ ജിതിന്‍കുമാര്‍ ( 21) എന്നിവരെയാണ് ഗുരുതര പരിക്കുകളോടെ തുറവൂര്‍ താലൂക്കാശുപത്രിയില്‍ പ്രവേശിപ്പിച്ചത്. ഞായറാഴ്ച രാത്രി 8.30 നായിരുന്നു സംഭവം. പള്ളിപ്പുറം സ്വദേശികളായ ഗിരിഷ് (30), മഹേഷ് (27) എന്നിവരാണ് വീട് കയറി ആക്രമിച്ചതെന്ന് ആശുപത്രിയില്‍ കഴിയുന്നവര്‍ പറഞ്ഞു. വടിവാള്‍, ഇരുമ്പ്‌വടി എന്നിവ ഉപയോഗിച്ചായിരുന്നു ആക്രമണം. വീടിന്റെ ചില്ലുകള്‍, കസേരകള്‍, കുക്കര്‍ എന്നിവ തല്ലിതകര്‍ത്തു. ആക്രമണം തടയാന്‍ ശ്രമിച്ച ജ്യോതിയേയും  ജിതിന്‍കുമാറിനെയും ഗിരീഷും മഹേഷുംകൂടി മര്‍ദ്ദിക്കുകയായിരുന്നുവെന്നു ഇവര്‍ പറഞ്ഞു. ചേര്‍ത്തല പൊലിസില്‍ പരാതി നല്‍കി.