ന്യൂഡല്‍ഹി: ഡല്‍ഹി വനിതാ കമ്മീഷന്‍ അധ്യക്ഷ സ്വാതി മലിവാളിനെതിരെ അഴിമതി വിരുദ്ധ വിഭാഗം എഫ്‌ഐആര്‍ രജിസ്റ്റര്‍ ചെയ്തു. ആം ആദ്മി പാര്‍ട്ടി അനുകൂലികളെ വനിതാ പാനലിലേക്ക് അനധികൃതമായി നിയമിച്ചുവെന്ന പരാതിയിലാണ് അന്വേഷണം.

ഇന്നലെ വനിതാ കമ്മീഷന്‍ ഓഫീസില്‍ എത്തിയ അന്വേഷണ സംഘം മലിവാളിനെ രണ്ട് മണിക്കൂറോളം ചോദ്യം ചെയ്തു. വനിതാ കമ്മീഷന്‍ മുന്‍ അധ്യക്ഷ ബര്‍ഖാ ശുക്ലാ സിംഗ് നല്‍കിയ പരാതിയിലാണ് നടപടി. യോഗ്യതയില്ലാതെ നിയമിക്കപ്പെട്ട 85 ഓളം പേരുടെ വിവരങ്ങളും ബര്‍ഖാ ശുക്ല കൈമാറിയിരുന്നു. സ്വാതി അധ്യക്ഷ പദവി ദുരുപയോഗം ചെയ്തുവെന്നും പരാതിയില്‍ പറയുന്നുണ്ട്.

കേസില്‍ സ്വാതിക്ക് 27 ചോദ്യങ്ങടങ്ങിയ ചോദ്യാവലി കൈമാറിയിട്ടുണ്ട്. ഒരാഴ്ചക്കുള്ളില്‍ ചോദ്യങ്ങള്‍ക്ക് കൃത്യമായ മറുപടി നല്‍കണമെന്നും എ.സി.ബി ആവശ്യപ്പെട്ടിട്ടുണ്ട്.