കണ്ണൂര്‍: കണ്ണൂര്‍ സിറ്റിയിലെ ഹംദര്‍ദ് ഓഫ്ക്യാംപസില്‍ ഡി.വൈ.എഫ്.ഐ-യൂത്ത്‌ലീഗ് സംഘര്‍ഷം. വിദ്യാര്‍ഥികളുടെ ഭാവി നഷ്ടമാക്കുന്ന തരത്തില്‍ ഏകാധിപതിയെ പോലെ പെരുമാറുന്ന ഡയറക്ടറെ മാറ്റണമെന്ന് ആവശ്യപ്പെട്ട് വിദ്യാര്‍ഥികള്‍ ഒറ്റക്കെട്ടായി നടത്തിയ സമരം ഏറ്റെടുക്കാന്‍ പാര്‍ട്ടികള്‍ ശ്രമിച്ചതാണ് സംഘര്‍ഷത്തില്‍ കലാശിച്ചത്. എസ്.എഫ്.ഐ ജില്ലാ ജോയിന്റ് സെക്രട്ടറി അന്‍വീറും റിജേഷും ക്യാംപസില്‍ കടക്കാന്‍ ശ്രമിച്ചപ്പോള്‍ സമരം ഒരു പാര്‍ട്ടിയുടെയും നേതൃത്വത്തിലല്ലായെന്ന് പറഞ്ഞ് വിദ്യാര്‍ഥികള്‍ തടഞ്ഞു. വീണ്ടും ഇവര്‍ ക്യാംപസില്‍ കടക്കാന്‍ ശ്രമിച്ചപ്പോള്‍ പുറത്തുണ്ടായിരുന്ന യൂത്ത് ലീഗ് പ്രവര്‍ത്തകര്‍ ഇടപെട്ടത് ഉന്തും തള്ളുമുണ്ടാക്കി. പൊലിസെത്തി ഇരുവിഭാഗത്തെയും മാറ്റി നിര്‍ത്തി മാനേജ്‌മെന്റുമായി ചര്‍ച്ച നടത്തി. വിദ്യാര്‍ഥികള്‍ പിരിഞ്ഞുപോകുന്നതിനിടെ എത്തിയ ഡി.വൈ.എഫ്.ഐ പ്രവര്‍ത്തകരും യൂത്ത് ലീഗ് പ്രവര്‍ത്തകരും പരസ്പരം ഏറ്റുമുട്ടുകയായിരുന്നു. പരുക്കേറ്റ യുത്ത് ലീഗ് കണ്ണൂര്‍ മുന്‍സിപ്പല്‍ സെക്രട്ടറി സഫ്‌വാന്‍ കുണ്ടറയില്‍, സി.എം ഇസ്സുദ്ദീന്‍, ഷംസീര്‍ മൈതാനിപള്ളി എന്നിവരെ ജില്ലാ ആശുപത്രിയിലും സി.പി.എം ലോക്കല്‍ സെക്രട്ടറി ഷഹ്‌റാസ്, തന്‍സീര്‍, നൗഷാദ് റിയാസ് എന്നിവരെ എ.കെ.ജി ആശുപത്രിയിലും പ്രവേശിപ്പിച്ചു.