ന്യൂഡല്‍ഹി:  ജഡ്ജിമാര്‍ക്ക് ഭൂമിയില്‍ ആരുടേയും സര്‍ട്ടിഫിക്കറ്റ് വേണ്ടെന്ന് സുപ്രിം കോടതി. കോടതിയില്‍ ജഡ്ജിമാരെ നിയമിക്കുന്നതിന് ഒരു പൊതു സമിതി വേണമെന്ന ഹരജി തള്ളിക്കൊണ്ടായിരുന്നു ജസ്റ്റിസ് അരുണ്‍ കെ മിശ്ര, യുയു ലളിത് എന്നിവരടങ്ങുന്ന ഡിവിഷന്‍ ബഞ്ചിന്റെ അഭിപ്രായ പ്രകടനം.

രാജ്യത്തെ ഹൈക്കോടതികളിലും സുപ്രിംകോടതിയിലും ജഡ്ജിമാരെ നിയമിക്കുന്നതില്‍ സ്വജനപക്ഷപാതമുണ്ടെന്ന് ഹരജിക്കാര്‍ ആരോപിച്ചു. കഴിവുള്ള വക്കീലന്‍മാരെ കണ്ടെത്തുന്നതില്‍ കൊളിജിയവും പരാജയപ്പെടുന്നു. അതിനാല്‍ ജഡ്ജിമാരെ തിരഞ്ഞെടുക്കുന്നതിന് ഒരു പൊതുസമിതി ഉണ്ടാക്കണമെന്നാണ് ഹരജിക്കാരുടെ ആവശ്യം.

എന്നാല്‍ തങ്ങള്‍ ഇതിന് അഭിപ്രായം പറയുന്നില്ലെന്ന് ഹരജി തള്ളിക്കൊണ്ട് കോടതി അഭിപ്രായപ്പെട്ടു. ഹരജിക്കാരന്റെ ആശയം നല്ലതോ ചീത്തതോ ആകാം. എന്നാല്‍ ഭരണഘടന അനുശാസിക്കുന്നപോലെ മാത്രമെ കോടതിക്കു ചെയ്യാനാകൂ എന്നും ബഞ്ച് അഭിപ്രായപ്പെട്ടു.