കൊച്ചി: മംഗളവനത്തിന്റെ ഭാഗമായുള്ള റെയില്‍വേ പുറമ്പോക്കില്‍ നിര്‍മാണപ്രവര്‍ത്തനങ്ങള്‍ നടത്തരുതെന്നു ദേശീയ ഹരിത ട്രൈബ്യൂണല്‍. മംഗളവനം പക്ഷിസങ്കേതത്തില്‍ റെയില്‍വേ നടത്തുന്ന നിര്‍മാണപ്രവര്‍ത്തനങ്ങള്‍ തടയണമെന്നാവശ്യപ്പെട്ട് ലോയേഴ്‌സ് എന്‍വയോണ്‍മെന്റല്‍ അവയര്‍നെസ് ഫോറം നല്‍കിയ ഹരജിയില്‍ ജസ്റ്റിസ് ഡോ. പി. ജ്യോതിമണി, വിദഗ്ധാംഗം പി.എസ് റാവു എന്നിവരുള്‍പ്പെട്ട ഡിവിഷന്‍ ബെഞ്ചാണ് ഉത്തരവു പുറപ്പെടുവിച്ചത്.
മംഗളവനം പക്ഷിസങ്കേതത്തില്‍ രണ്ടു സര്‍വേ നമ്പരുകളിലായി 2.3945 ഹെക്ടര്‍ റെയില്‍വേ പുറമ്പോക്കു ഭൂമി കൂടി ഉള്‍പ്പെട്ടിട്ടുണ്ട്. 2004 ഓഗസ്റ്റ് 31ലെ സംസ്ഥാന വനംവകുപ്പിന്റെ വിജ്ഞാപനത്തില്‍ ഈ ഭൂമിയുള്‍പ്പെടെയുള്ള ഭാഗമാണ് പക്ഷി സങ്കേതമാണെന്നു വ്യക്തമാക്കിയിട്ടുള്ളത്. ഈ സാഹചര്യത്തില്‍ വനേതര പ്രവര്‍ത്തനങ്ങള്‍ക്കായി ഈ ഭൂമി റെയില്‍വേയ്ക്ക് ഉപയോഗിക്കാനാവില്ലെന്നും ട്രൈബ്യൂണല്‍ വ്യക്തമാക്കി.
മംഗളവനം സംരക്ഷിക്കുമെന്ന് 2009ല്‍ സര്‍ക്കാര്‍ വ്യക്തമാക്കിയിരുന്നു. മംഗളവനം നിലനിര്‍ത്തേണ്ടതുണ്ടെന്നു വനംവകുപ്പും വ്യക്തമാക്കിയിരുന്നു. എന്നാല്‍, ഇതിനായി എന്തു നടപടി സ്വീകരിച്ചുവെന്ന് സര്‍ക്കാര്‍ വ്യക്തമാക്കിയിട്ടില്ല.
ഈ സാഹചര്യത്തില്‍ മംഗളവനത്തിന്റെ സംരക്ഷണത്തിനു എന്തു നടപടികള്‍ സ്വീകരിച്ചുവെന്ന് വ്യക്തമാക്കി സര്‍ക്കാര്‍ ഒക്ടോബര്‍ മൂന്നിലെ സിറ്റിങ്ങില്‍ സത്യവാങ്മൂലം നല്‍കണമെന്നും ട്രൈബ്യൂണല്‍ വ്യക്തമാക്കി.