തലപ്പുഴ: ദിനവും നൂറുക്കണക്കിന് പേര്‍ സഞ്ചരിക്കുന്ന പാലം അപകട ഭീഷണിയില്‍. തലപ്പുഴ- കാപ്പിക്കളം അണക്കെട്ടിന് കുറുകെയുള്ള പാലമാണ് കോണ്‍ക്രീറ്റ് അടര്‍ന്ന് വീണ് നാശത്തിന്റെ വക്കിലെത്തിയിരിക്കുന്നത്. കോണ്‍ക്രീറ്റിന് ഉപയോഗിച്ച കമ്പികള്‍ പുറത്തുകാണുന്ന നിലയിലാണിപ്പോള്‍. മലവെള്ള പാച്ചിലില്‍ പഴയ പാലം ഒഴുകി പോയതോടെ 1991ലാണ് പാലം പുതുക്കി പണിതിരുന്നു. എന്നാല്‍ വാഹനം കടന്നുപോകാന്‍ കഴിയുന്ന വിധത്തില്‍ പാലം നിര്‍മിക്കണമെന്ന ആവശ്യം അധികൃതര്‍ അവഗണിക്കുകയായിരുന്നു. തുടര്‍ന്ന് കാല്‍നട മാത്രം സാധ്യാമാകുന്ന പാലം നിര്‍മിക്കുകയായിരുന്നു. മക്കിമലയിലേക്ക് സര്‍വിസ് നടത്തുന്ന ഏകസ്വകാര്യ മിനിബസ് ഈ വഴിക്ക് കടന്നു പോയാല്‍ ആയിരക്കണക്കിന് വിദ്യാര്‍ഥികള്‍ക്കും നാട്ടുകാര്‍ക്കും അത് വലിയ ഗുണം ചെയ്യും.
ഇപ്പോള്‍ ബസ് സര്‍വിസ് നടത്തുന്നത് ഫോറസ്റ്റിന്റെ ഇടയിലൂടെ കടന്നു പോകുന്ന റോഡിലൂടെയാണ്. വന്യമൃഗ ശല്യം രൂക്ഷമായ ഇതിലൂടെയുള്ള യാത്രയും ദുഷ്‌കരമാണ്.
പാലം പുതുക്കി പണിയാന്‍ ഫണ്ട് വകയിരുത്തിയിട്ടുണ്ടെന്നാണ് പഞ്ചായത്ത് അധികൃതര്‍ നല്‍കുന്ന വിവരം. വാഹന ഗതാഗതത്തിന് ഉതകുന്ന രീതിയില്‍ പാലം പുതിക്കി പണിതാല്‍ നാട്ടുകാര്‍ക്കും വിദ്യാര്‍ഥികള്‍ക്കും ഏറെ ഉപകാരപ്പെടും.
പാലം യാഥാര്‍ഥ്യമാക്കാന്‍ അടിയന്തര നടപടിയുണ്ടാകണമെന്നാണ് നാട്ടുകാരുടെ ആവശ്യം