കാസര്‍കോട്: സ്വകാര്യ ബസിന്റെ വാതില്‍പ്പടിയില്‍ നിന്ന് യാത്രചെയ്യുന്നതിനിടയില്‍ റോഡരികിലെ വൈദ്യുതി തൂണില്‍ തലയിടിച്ച് യുവാവിന് സാരമായി പരുക്കേറ്റു. ഉളിയത്തടുക്ക എസ്.പി നഗറിലെ വാടക ക്വാര്‍ട്ടേര്‍സില്‍ താമസിക്കുന്ന ഹഫീസി (18)നാണ് പരുക്കേറ്റത്. സീതാംഗോളി-വിദ്യാനഗര്‍ റൂട്ടിലോടുന്ന സ്വകാര്യ ബസില്‍ യാത്രചെയ്യുന്നതിനിടെ ഇന്നലെ രാവിലെയാണ് സംഭവം. ബസില്‍ വിദ്യാര്‍ഥികളടക്കം നിറയെ യാത്രക്കാരുണ്ടായിരുന്നതിനാല്‍ വാതില്‍പ്പടിയില്‍ നിന്നായിരുന്നു ഹഫീസ് യാത്ര ചെയ്തിരുന്നത്. അതിനിടെയാണ് എസ്.പി. നഗറിനും ഇസ്സത്ത് നഗറിനും ഇടയില്‍ വച്ച് വൈദ്യുതി തൂണില്‍ തലയിടിച്ചത്.  പരുക്ക് സാരമുള്ളതായതിനാല്‍  മംഗളുരു ആശുപത്രിയിലേക്ക് മാറ്റി.