പയ്യന്നൂര്‍: കോണ്‍ഗ്രസ് നേതൃത്വത്തിലുള്ള പയ്യന്നൂര്‍ കോ.ഓപറേറ്റിവ് ബാങ്കിലെ ഉദ്യോഗസ്ഥ നിയമനത്തെ ചൊല്ലി കോണ്‍ഗ്രസ് പ്രവര്‍ത്തകര്‍ ചേരിതിരിഞ്ഞു തമ്മിലടിച്ചു. ഇന്നലെ രാത്രി എട്ടോടെയാണ് സംഭവം. നിയമനത്തില്‍ പ്രതിഷേധിച്ച് ഒരു വിഭാഗം കോണ്‍ഗ്രസ് പ്രവര്‍ത്തകര്‍ ഇന്നു മുതല്‍ ടൗണ്‍ ബാങ്കിനു മുന്നില്‍ അനിശ്ചിതകാല സമരം പ്രഖ്യാപിച്ചിരുന്നു. ഇതിന്റെ ഒരുക്കങ്ങള്‍ നടത്തുന്നതിനിടെ മറുഭാഗം ഇതു ചോദ്യം ചെയ്തതാണു വാക്കേറ്റത്തിനും തമ്മിലടിക്കും കാരണമായത്. പയ്യന്നൂര്‍ ടൗണ്‍ ബാങ്കില്‍ ഒഴിവുള്ള തസ്തികകളിലേക്കു നിയമനം നടത്തുന്നതിനായി ഇന്റര്‍വ്യൂ നടത്തി റാങ്ക് ലിസ്റ്റ് തയാറാക്കിയിരുന്നു. എന്നാല്‍ സാധാരണ പാര്‍ട്ടി പ്രവര്‍ത്തകരെ തഴഞ്ഞു കൊണ്ട് കോഴ വാങ്ങി സ്വന്തക്കാരെയും ബന്ധുക്കളെയും റാങ്ക് ലിസ്റ്റില്‍ ഉള്‍പ്പെടുത്തി അനധികൃത നിയമനം നല്‍കാന്‍ നീക്കം നടത്തുന്നുവെന്നാരോപിച്ച് യൂത്ത് കോണ്‍ഗ്രസ് പയ്യന്നൂര്‍ മണ്ഡലം പ്രസിഡന്റ് രജീഷ് കണ്ണോത്തിന്റെ നേതൃത്വത്തില്‍ സഹകരണ വകുപ്പ് ജില്ലാ രജിസ്ട്രാര്‍ക്കും കെ.പി.സി.സിക്കും പരാതി നല്‍കിയിരുന്നു. ഇന്നലെ പരാതി സംബന്ധിച്ച് അസി. രജിസ്ട്രാര്‍ക്കു മുന്നില്‍ തെളിവെടുപ്പും നടന്നു.
ഇതിനു ശേഷം ബാങ്ക് ഭരണസമിതിക്കു നിയമനവുമായി മുന്നോട്ടു പോകാന്‍ ജില്ലാ സഹകരണ രജിസ്ട്രാര്‍ അനുമതി നല്‍കിയതായി അറിയുന്നു. ഇതേ തുടര്‍ന്നാണ് യൂത്ത് കോണ്‍ഗ്രസ് പയ്യന്നൂര്‍ നിയോജക മണ്ഡലം കമ്മിറ്റിയുടെ നേത്യത്വത്തില്‍ ബാങ്കിനു മുന്നില്‍ ഇന്നു മുതല്‍ അനിശ്ചിതകാല സമരം നടത്തുവാന്‍ തീരുമാനിച്ചത്. സംഭവമറിഞ്ഞു കൂടുതല്‍ നേതാക്കള്‍ സ്ഥലത്തെത്തിയാണ് പ്രശ്‌നത്തിനു താല്‍ക്കാലിക പരിഹാരമായത്.