മലപ്പുറം: ഈ വര്‍ഷത്തെ ജില്ലാ ശാസ്‌ത്രോല്‍സവത്തിന്റെ പ്രഥമമത്സരമായ ശാസ്ത്രസെമീനാര്‍ ഐ.ടി. അറ്റ് സ്‌കൂള്‍ റിസോഴ്‌സ് സെന്ററില്‍ ജില്ലാ വിദ്യാഭ്യാസ ഡെപ്യൂട്ടി ഡയറക്ടര്‍ പി. സഫറുള്ള ഉദ്ഘാടനം ചെയ്തു. ഭക്ഷ്യസുരക്ഷക്കു പയറുവര്‍ഗങ്ങള്‍  സാധ്യതകളും വെല്ലുവിളികളും' എന്ന വിഷയത്തില്‍ 17 സബ്ജില്ലകളില്‍ നിന്നായി 34 മത്സരാര്‍ഥികള്‍ മാറ്റുരച്ച മത്സരത്തില്‍ മഞ്ചേരി ഗവ. ഗേള്‍സ് ഹയര്‍സെക്കന്‍ഡറി സ്‌കൂളിലെ അക്തര്‍ കെ.പി ഒന്നും മഞ്ചേരി ഗവ. ബോയ്‌സ് ഹയര്‍സെക്കന്‍ഡറി സ്‌കൂളിലെ പാര്‍വതി.കെ. രണ്ടും സ്ഥാനങ്ങള്‍ കരസ്ഥമാക്കി സംസ്ഥാന മത്സരത്തില്‍ പങ്കെടുക്കാന്‍ യോഗ്യത നേടി.
എസ്.എസ്.എ . ജില്ലാപ്രോഗ്രാം ഓഫിസര്‍ കെ. ശിവദാസന്‍ ആധ്യക്ഷനായി. ഐ.ടി.അറ്റ് സ്‌കൂള്‍ ജില്ലാകോര്‍ഡിനേറ്റര്‍ പി.ഹബീബുറഹ്മാന്‍ , ജില്ലാ സയന്‍സ് ക്ലബ് അസോസിയേഷന്‍ സെക്രട്ടറി കെ. മനേഷ്, മലപ്പുറം സബ് ജില്ലാ സെക്രട്ടറി എ. മുഹമ്മദ് ഷാഫി എന്നിവര്‍ പ്രസംഗിച്ചു. കഴിഞ്ഞ രണ്ടു വര്‍ഷങ്ങളിലും സംസ്ഥാനതലത്തില്‍ ഒന്നും രണ്ടും സ്ഥാനങ്ങള്‍ മലപ്പുറത്തു നിന്നും പങ്കെടുത്ത കുട്ടികള്‍ക്കായിരുന്നു.